Moody’s AQSh-tyń nesıelik reıtıngin tómendetti

ASTANA. KAZINFORM — Moody’s Ratings halyqaralyq reıtıng agenttigi AQSh úkimetiniń uzaq merzimdi emıtent reıtıngi men boryshtyq reıtıngin eń joǵary Aaa deńgeıinen Aa1-ge deńgeıine tómendetetinin jarııalady, dep habarlaıdy Kazinform tilshisi.

21 satylyq reıtıng shkalasy boıynsha reıtıngtiń bir satyǵa tómendeýi sońǵy onjyldyqta jáne odan da kóp ýaqyt ishinde memlekettik qaryzdyń jáne qaryzǵa qyzmet kórsetý shyǵyndarynyń turaqty ósýin kórsetedi, dep habarlady Moody’s. Bul kórsetkishter qazirdiń ózinde salystyrmaly reıtıngteri bar elder úshin uqsas kórsetkishterden aıtarlyqtaı asyp túsedi.

Moody’s atap ótkendeı, AQSh-tyń kezekti ákimshiligi men Kongress joǵary bıýdjet tapshylyǵy men paıyzdyq tólemderdiń ósý úrdisin keri qaıtaratyn sharalar týraly kelisimge kele almady.

Qazir qaralyp jatqan bıýdjettik usynystar mindetti shyǵystar men tapshylyqtyń kóp jyldyq qysqarýyna ákelmeıdi, dep habarlaıdy agenttik.

Sarapshylardyń boljaýynsha, aldaǵy onjyldyqta bıýdjet tapshylyǵy áleýmettik mindettemelerge shyǵystardyń ulǵaıýy men turaqty memlekettik kirister aıasynda ósedi. Bul qaryzdyq júktemeni arttyrady jáne qaryzǵa qyzmet kórsetý shyǵyndarynyń odan ári ósýine ákeledi. Osylaısha, AQSh-tyń fıskaldyq kórsetkishteri — tarıhı kontekstte de, reıtıngi joǵary basqa elderge qatysty da nasharlaýy múmkin.

Reıtıngtiń tómendeýine qaramastan, Moody’s Aa1 deńgeıinde «teńdestirilgen táýekelderdi» kórsetetin turaqty boljamdy saqtaıdy. AQSh-tyń kúshti jaqtary arasynda agenttik ekonomıkanyń aýqymyn, turaqtylyǵyn sondaı-aq dollardyń álemdik rezervtik valıýta retindegi mártebesin atap ótedi.