Monterdiń ólimine qatysty «Alataý jaryq» kompanııasy túsinikteme berdi

Almatyda elektr jóndeýshini toq soǵyp, qaza tapty. Oqys oqıǵa keshe 18:28 shamasynda «Atmosfera» turǵyn úı kesheninde boldy. Er adam Talǵar elektr taratý toraby mekemesiniń ruqsatynsyz jumys júrgizgen. Bul týraly «Alataý jaryq» kompanııasy málim etti, dep habarlaıdy Kazinform. 

Kompanııa baspasóz qyzmetiniń málimetinshe, 12 qazan kúni saǵat 16:00-de jedel ótinishke sáıkes, 2316- transformatorlyq stantsııa jelisindegi ajyratqyshty aýystyrý úshin elektr energııasyn qashyqtyqqa jetkizetin (VL-10 kV) jeli toqtan ajyratyldy. Saǵat 18:00-de jumys aıaqtalǵannan keıin dıspetcher 10kV F-2/13I áýe jelisin qosýǵa ruqsat berdi. Alaıda, qysqa tuıyqtalý saldarynan jeli qosylmady. Aqaýdy tekserýge arnaıy top shyqty. 

«Saǵat 18:28-de ortalyq dıspetcherlik qyzmettiń kezekshi bóliminen «Atmosfera» turǵyn úı kesheniniń aýmaǵynda bir adamnyń toqqa túskeni týraly habarlama keldi. Aqparatty anyqtaý úshin Talǵar aýdandyq elektr taratý toraby mekemesiniń aǵa mamany jiberildi. Oqıǵa ornyna jetken maman «Atmosfera» turǵyn úı kesheniniń transformatorlyq qosalqy stantsııasynda belgisiz er adamnyń toqqa túsip, elektr baǵanasyna jabysyp qalǵanyn rastady», - delingen AJK taratqan habarlamada. 

Málim bolǵandaı, er adam turǵyn úı kesheniniń elektrshisimen birge, Talǵar aýdandyq elektr taratý toraby mekemesiniń ruqsatynsyz jumys júrgizgen. 

«Saǵat 20:40 tótenshe jaǵdaılar departamentiniń qyzmetkerleri ony baǵanadan túsirdi. Jedel járdem brıgadasy onyń qaıtys bolǵanyn habarlady», - dep atap ótti kompanııadan. 

Atalǵan oqıǵaǵa qatysty Túrksib aýdandyq polıtsııa basqarmasy tergeý jumystaryn bastady. 

Eske sala keteıik, Almatyda elektr baǵanasyna shyqqan monter tirideı janyp ketkenin jazǵan bolatynbyz.