Monshada janjal shyǵarǵan atyraýlyq 15 jylǵa sottaldy
ATYRAÝ. QazAqparat - Atyraý oblysynyń qylmystyq ister boıynsha mamandandyrylǵan aýdanaralyq soty alqabılerdiń qatysýymen saýnada búlik shyǵarǵan azamatty 15 jylǵa bas bostandyǵynan aıyrdy.
«Basty sot talqylaýynda anyqtalǵandaı, 2016 jyldyń 11 aqpanynda azamat S.B. týystarymen birge Atyraý qalasyndaǵy monshalardyń birine kelgen. Іshimdikke toıǵan er adam saýna qyzmetiniń aqysyn tóleýden úzildi-kesildi bas tartqan. Ol kólikke otyryp, saýnaǵa kelýshiler men onyń qyzmetkerleriniń artynan qýalaı bastaǵan. Olardyń birin qaǵyp túsirip, ústimen júrip ótken. Keıin oqıǵa ornynan izin sýytqan. Saldarynan jábirlenýshi sol jerde kóz jumdy. Іs alqabılerdiń qatysýymen jabyq kúıde ótti. Sot sheshimimen S.B. kináli dep tanylyp, ol 15 jylǵa bas bostandyǵynan aıyryldy. Jazany qatań rejimdegi abaqtyda óteıtin bolady», - dep málim etti Atyraý oblysy qylmystyq ister boıynsha mamandandyrylǵan aýdanaralyq sotynyń baspasóz qyzmetinen.
