Monserrat Kabale salyqtan jaltarǵany úshin jaýapkershilikke tartylýy múmkin
ASTANA. QazAqparat - Búkil álemge tanymal ıspandyq opera ánshisi Monserrat Kabale óz elinde salyq tóleýden jaltarǵany úshin qylmystyq jaýapkershilikke tartylýy múmkin, dep habarlaıdy Ýtro.rý.
The Guardian habarlaǵandaı, koroldiktiń quqyq qorǵaý organdarynyń talaparyzy 2010 jyly Máskeý, Jeneva jáne ártistiń týǵan jeri Barselona qalasynda ótken kontsertterge baılanysty. Tergeý derekteri boıynsha ánshiniń óner kórsetýine qatysty kelisimsharttarǵa ıspandyq bıýdjetke salyq tóleýden jaltarý maqsatynda Andorrada tirkelgen kompanııa arqyly qol qoıylǵan. Ispandyq prokýratýra óz talaparyzynda óner ıesiniń eldiń salyq organdaryna deklaratsııa berýge mindetti bolǵanyn atap ótti, óıtkeni ol Barselona rezıdenti bolyp tabylady. Ánshiniń Andorrada turatyndyǵy týraly bergen dálelin qadaǵalaý organy qaraýǵa almady. Tártip saqshylarynyń esebi boıynsha opera ánshisi 508 myń eýrodan astam tólem tóleýden jaltarǵan. Sottyń alǵashqy otyrysy 9 mamyrda ótedi dep kútilýde. Aıta keteıik, Monserrat Kabaleniń ataq-dańqy Rossını, Bellını jáne Donıtsettıdiń klassıkalyq týyndylarynyń partııalaryn oryndaý kezinde óziniń belkanto oryndaýshylyǵynyń arqasynda týǵan jeri Ispanııadan da asyp, shetelderge keńinen jaıylyp ketken. Óner jolynda ol «Queen» tobynyń ánshisi Freddı Merkıýrımen birlesip Barselonda 1992 jylǵy Olımpıada oıyndarynyń ashylýynda basty ándi aıtý tárizdi batyl qadamdarymen kózge túsken.
