Monreal týrnıri: Elena Rybakına kambek jasap, shırek fınalǵa shyqty

ASTANA. KAZINFORM — Qazaqstannyń birinshi, álemniń 12-raketkasy Elena Rybakına Monreal (Kanada) WTA 1000 týrnıriniń shırek fınalyna ótti.

Jarystyń 9-raketkasy bolyp tirkelgen qazaqstandyq tennısshi ortalyq kortta tórtinshi aınalymda WTA reıtıngisinde 35-orynda turǵan ýkraınalyq Daıana ıAstremskaıany synap kórdi.

Qarsylastar osyǵan deıin ózara bıylǵy Aýstralııa ashyq chempıonatynda kezdesip, onda Rybakına 6:3, 6:4 esebimen basym túsken edi. 

Bul joly birinshi sette esep 3:3 bolǵan mezette Rybakına breık jasaǵanymen, ıAstremskaıa sol boıda tarazy basyn teńestirdi. Sodan keıin qazaqstandyq sportshynyń dop bergende, jıi qateleskenin paıdalanyp ketti — 7:5.

Ekinshi sette Elena qos breıkpen aıqyn basymdylyq tanytty — 6:2.

Úshinshi, sheshýshi partııada Elena breıkpen alǵa shyqqanymen, qatelikke boı aldyryp, óz geımin berip qoıdy — 3:3. Degenmen esep 6:5 bolǵanda, tórtinshi matchbolyn qur jibermedi — 7:5.

Eki saǵat 33 mınýtqa sozylǵan tartysty básekede Rybakına 7 eıspen birge 9 breık-poınttyń beseýin paıdalandy. ıAstremskaıa 4 breık, 3 breıkpen (7 breık-poınt) erekshelendi.
Qazaqstandyq tennısshi oıynnan soń tartysqa toly matchta jeńiske jetkenine qýanyshty ekendigin atap ótti.

Elena Rybakına jartylaı fınalǵa shyǵý úshin álemniń 28-raketkasy, taǵy bir ýkraınalyq Marta Kostıýkpen talasady. Ol 2 saǵat 42 mınýtqa sozylǵan kezdesýde reıtıngide 32-satydaǵy amerıkalyq Makkartnı Kesslerden aılasyn asyrdy — 5:7, 6:3, 6:3.

Eske sala keteıik, budan buryn 17 jastaǵy Damır Jalǵasbaıdyń alǵash ret eresekter arasyndaǵy týrnırde top jarǵanyn jazǵan bolatynbyz.