Monopolıstik qyzmetti shekteýge baǵyttalǵan Prezıdent Jarlyǵy kópshilik talqyǵa shyǵaryldy

ASTANA. QazAqparat – Eldegi monopolıstik qyzmetti shekteýge baǵyttalǵan Prezıdent Jarlyǵynyń jobasy ázirlenip, ashyq talqyǵa shyǵaryldy, dep habarlaıdy QazAqparat tilshisi.

«Memlekettiń kásipkerlik qyzmetke qatysýyn azaıtý jáne jeke sektordy damytý úshin jaǵdaılar jasaý maqsatynda qaýly etemin:

Qazaqstan Respýblıkasy Prezıdentiniń tapsyrmasy jáne kelisimi boıynsha osyndaı quqyqtardy berý jaǵdaılaryn qospaǵanda, memlekettiń taýardy óndirýge nemese satýǵa, satyp alýǵa nemese ony paıdalanýǵa aıryqsha quqyǵyn zańmen bekitýge bastamashylyq jasaýǵa, sondaı-aq naryq sýbektisine zańmen arnaıy quqyq berýge 2025 jyldyń 31 jeltoqsanyna deıin moratorıı engizilsin», - delingen Ashyq NQA portalynda jarııalanǵan Prezıdent Jarlyǵynyń jobasynda.

Básekelestikti qorǵaý jáne damytý agenttiginiń túsindirmesine saı, atalǵan bastama taýar naryǵynyń jumysyn jetildirip, adal básekelestik ornatyp, monopolıstik qyzmetti shekteý úshin usynylyp otyr.

Bul sharany oryndaý Úkimetke, Prezıdentke tikeleı baǵynatyn jáne esep beretin memlekettik vedomstvolar men jergilikti atqarýshy organdarǵa júkteledi. Al onyń oryndalý barysyn Prezıdent Ákimshiligi qadaǵalaıdy.

Jarlyq-jobasy 21 qyrkúıekke deıin kópshilik talqylaýda bolady.