Monopolısterge 3,1 mlrd. teńge mólsherde aıyppul salyndy - TMRA
ASTANA. 1 qarasha. QazAqparat - Aǵymdaǵy jyly elimizdegi monopolısterge salynǵan aıyppul sanktsııalarynyń somasy 3,1 mlrd. teńgeni qurady. Bul týraly búgin brıfıng barysynda QR Tabıǵı monopolııalardy retteý agenttiginiń tóraǵasy Murat Ospanov málim etti.
«Aǵymdaǵy jyly monopolıster qyzmetine baqylaý kúsheıtildi. Atap aıtqanda, tutynýshylardyń quqyǵynyń buzylýyna jol bermeý maqsatynda jyl basynan 1090 uıǵarym engizildi. Al salynǵan aıyppul sanktsııalarynyń jalpy somasy 3,1 mlrd. teńgeni qurap otyr. Buden bólek, tutynýshylarǵa keltirilgen zalaldyń ornyn toltyrý maqsatynda 1,2 mlrd. teńgeni quraıtyn birqatar tarıftik ótemaqy engizildi. Al syrtqy aýa temperatýrasynyń ózgeristerine baılanysty qaıta esepteýler nátıjesinde jylytý maýsymy úshin tólengen qarajattyń 490 mln. teńgesi halyqqa qaıtaryldy», - deıdi agenttik tóraǵasy.
Bul rette agenttik basshysy máseleniń aıyppul sanktsııalardy ósirýge qatysty emes ekendigin, kerisinshe monopolısterdiń aktıvterdi jańǵyrtý boıynsha óz mindetterin durys atqarmaı otyrǵanyna qatysty bolyp otyrǵanyn alǵa tartty. «Byltyrǵy jyly júrgizilgen tekserýlerdiń nátıjesinde zań buzýshylyqtardy joıý boıynsha 744 usynym jazylyp, aıyppul sanktsııalary túrinde 205 mln. teńge óndirilip alyndy», - dedi M. Ospanov.
