Monopolısterdiń barlyǵy tarıfti arzandatady - mınıstr

ALMATY. QazAqparat  - Qazaqstanda turǵyn úı kommýnaldyq sharýashylyq salasyndaǵy barlyq monopolıster tarıf baǵasyn arzandatady. Bul týraly Almaty ákimdiginde bolǵan otyrysta QR Ulttyq ekonomıka mınıstri Tımýr  Súleımenov aıtty, dep habarlaıdy QazAqparat tilshisi.

Mınıstr osy ýaqytqa deıin sýmen, gazben, jylýmen qamtý kásiporyndarymen ashyq áńgime júrgizilgenin aıtty.

«QazTransGaz Aımaq» AQ gaz quny júıeli operatordan alatyn baǵasyna baılanysty ekenin aıtty. Jylý qunynyń 35-60%-y kómir baǵasy men jetkizý qunyna táýeldi. Biraq ol jerde de aıtylmaı jatqan shıkilikter kóp. Ony birtindep shyǵaramyz. Eń bastysy barlyq monopolıster tarıfti túsiretin boldy. Sondaı-aq, tarıf quny jyldan jylǵa ozyq tehnologııalardy engizýge baılanysty odan da arzandaýy kerek», - dedi ol.

Mınıstrdiń aıtýynsha, barlyq másele QR Energetıka mınıstrligimen birige sheshiledi.

«AlES ( «Almatyelektrostansalary» AQ) energııa kózi retinde kómirdi paıdalanady. Olardyń aıtýynsha, byltyr kómirdi jetkizý quny 30%-ǵa kóterilgen. Endi bul jaǵyn «Qazaqstan temir joly» AQ, QR IDM men birigip sheshetin bolamyz», - dedi Tımýr Súleımenov.

Sonymen qatar, jıynda Almaty qalalyq tabıǵı monopolııalardyń jumysyn retteý departamentiniń basshysy Bolat Sámbetov qatysqan edi.

Ol «Almaty Sý» kásipornynyń tarıfti 43 paıyzǵa kóterý týraly ótinishi qabyldanbaǵanyn jetkizdi.

Buǵan mınıstr asyra silteýden saq bolýdy eskertti.

«43%-ǵa kóterýge múmkindik bermedim deısizder. Asyra silteý bolmasyn. Sizder monopolıster men tutynýshylar arasyndaǵy balansty saqtaýlaryńyz kerek. Keıin sýdyń sapasy nasharlap, tutynýshylar shaǵymdanyp júrmesin», - dedi mınıstr.

Aıta ketý kerek, 7 qarashada Memleket basshysy Nursultan Nazarbaev  Qaýipsizdik keńesiniń otyrysynda kommýnaldyq qyzmetterge tarıfterdi zańsyz ósirgen tabıǵı monopolııalar sýbektilerin jazalaýdy talap etken bolatyn.

Memleket basshysy  tekserý barysynda energııa jetkizýshi kompanııalar tarapynan halyqqa keltirilgen 14 mlrd teńge somasynda shyǵyn anyqtalǵanyn atap ótti. 15 mlrd teńge somasynda energııamen qamtamasyz etetin uıymdardyń zańsyz kirisi belgili boldy.

Sonymen qatar jaqynda Almaty prokýratýrasy tabıǵı monopolııalardyń qyzmetin teksergen bolatyn.

Qalalyq prokýratýranyń baspasóz qyzmetiniń habarlaýynsha, kommýnaldyq kásiporyndar 6,6 mlrd teńgeni artyq alyp qoıǵan.