Monopolıster joǵary jalaqy men bonýstardy kimniń esebinen alyp júr
«Astana sý arnasy», «Astana-REK» sııaqty kompanııalar eski erejeler men normalardy paıdalanyp, shamadan tys aıyppuldardy salyp otyrady. Máselen, Astana sý arnasyna plomba salýǵa tapsyrys berseń, olar úsh aı, tórt aı kelmeı júredi. Sosyn qubyrlardyń ótkizý kólemine qaraı aıyppuldy burq etkizedi. Ol nysanda sýdy paıdalandy ma, joq pa, bálkim, áli jóndeý jumystary júrip jatyr, oǵan qaramaıdy. Mysaly, olar meniń esepteýish quralyma jarty jyl boıy plomba salmaı júrdi. Artynan kelip, 1,2 mıllıon aıyppuldy salyp kep jiberdi. Negizi, monopolıster úshin bul qosymsha tabys tabýdyń kózine aınaldy. Sol aqshaǵa ózderine bonýstardy jazyp alady, joǵary jalaqy qoıady. Sondyqtan salyq tóleýshilerdiń esebinen tabys tabýdyń zańsyz jolyna tosqaýyl qoıý qajet», - dedi Shajanbaeva búgin Astana qalalyq kásipkerler palatasynyń otyrysynda.
Aıta keteıik, sol jerde taǵy bir kásipkerdiń máselesi qaraldy. Astana sý arnasy oǵan 28,4 mıllıon teńge kóleminde aıyppul saldy. «Men sýǵa aı saıyn 160-200 myń teńge tóleımin. Endi, aıyppuldy 28 mıllıon teńgege jazyp berip otyr. Biz barlyq krandardy ashyp, sýdy aǵyzdyp qoısaq ta, ondaı aqsha shyqpaıdy. Sosyn plombany buzǵan kimge tıimdi? Mysaly, maǵan tıimsiz. Men úshin aıyna 200 myń teńge tólep otyrǵan durys emes pe? Biz aı saıyn bankke 17 mıllıon teńge tóleımiz. Al onyń ústine 28 mıllıon teńge aıyppul salǵan ońaı deısiz be?», - deıdi «Marden» bıznes ortalyǵyna qyzmet kórsetýshi kompanııanyń dırektory Juldyz Kákenov.
Búginde kásipkerler eski erejelerdi ózgertip, aıyppuldy qubyrlardyń ótkizý kólemine qaraı emes, sýdy tutynýdyń ortasha mólsherine qaraı esepteý kerek dep sanaıdy.