Monopolıster xalyqty qalaı aldaıdy
ASTANA. QazAqparat - Búginde zań boıynsha monopolıster ınvestıtsııalyq tarıf arqyly qosymsha qarjy tartyp, ol aqshany ınjenerlik jelilerdi jóndeýge jumsaı alady. Alaıda atalǵan qarajat tutynýshylarǵa qaıtarylýy shart. Monopolıster zańnyń dál osy normasyn oryndamaı jatady, dep xabarlaıdy QazAqparat tilshisi.
«Qaraǵandy oblysy kásipkerleriniń qaýymdastyǵy» ZTB basshysy Nıkolaı Abttyń aıtýynsha, osydan jeti jyl buryn elektrenergııa salasyndaǵy keıbir kásiporyndar ınvestıtsııalyq tarıfti bekittirip aldy. Al ondaı tarıfti alý úshin ınvestıtsııalyq baǵdarlamany qorǵaý qajet. Sonyń nátıjesinde quziretti memlekettik organ bes jylǵa ınvestıtsııalyq tarıfti engizýge ruqsat berdi.
«Bes jyl ótti, biraq eshkim tarıfti tómendetken joq. Bári sol baıaǵy joǵary tarıfpen jumys istep keledi. Sonda ınjenerlik jelilerdi jańartýǵa xalyqtyń aqshasy tartylyp otyr. Oǵan qarapaıym tutynýshylardan eshkim ruqsat suraǵan da joq. Álemdik tájirıbe boıynsha ondaı qarjy ınvestorlarǵa qaıtarylady. Bizdiń zańnamamyzda da anyq jazylǵan, «ınvestıtsııalyq baǵdarlama» qarajatty salýdy ǵana emes, sol qarajatty qaıtarýdy da kózdeıdi», - dedi N.Abt «Protecting business and investments» jobasynyń qorytyndysyna arnalǵan jıynda.
Aıta keteıik, «Tabıǵı monopolııalar týraly» QR Zańyna sáıkes, ınvestıtsııalyq baǵdarlama - bir nemese birneshe ınvestıtsııalyq jobalardy qamtıtyn, tehnıkalyq-ekonomıkalyq nátıje alý maqsatynda qysqa merzimdi, orta merzimdi nemese uzaq merzimdi kezeńderge arnalǵan, tabıǵı monopolııa sýbektisiniń energııa únemdeýdi jáne energııa tıimdiligin arttyrýdy qamtamasyz etýge, qolda bar aktıvterin keńeıtýge, qalpyna keltirýge, jańartýǵa, qoldaýǵa, negizgi quraldaryn rekonstrýktsııalaýǵa, tehnıkalyq qaıta jaraqtandyrýǵa, jańa aktıvterin jasaýǵa baǵyttalǵan qarajatty salý jáne qaıtarý baǵdarlamasy.
«Máselen, Qaraǵandy oblysyndaǵy monopolıster ınvestıtsııalyq baǵdarlamany qorǵaǵanda artynan tómen tarıf arqyly barlyq qarjyny qaıtaramyz dep aıtqan. Biraq qazir ol jaıynda eshkim lám-mım demeıdi. Demek, monopolıster xalyqtyń aqshasyn aldy da, ony qaıtarýdy «umytyp ketti». Ony qalaı ataýǵa bolady? Árıne, «zańdy buzý» nemese «iri kólemde aqsha jymqyrý» desek bolady», - dep atap kórsetti N.Abt.
