Monopolıster turǵyn úılerdi basqarýdyń jańa formasyna kóshýge kedergi keltirip otyr – MIB tóraǵasy

NUR-SULTAN. QazAqparat – Turǵyn úı qurylysyndaǵy monopolıster jańa salynǵan kóppáterli úılerdiń basqarýdyń jańa formasyna kóshýine kedergi keltirip otyr. Ortalyq kommýnıkatsııalar qyzmetinde ótken brıfıngide múlik ıeleri birlestiginiń tóraǵasy Erkebulan Myńjasarov osyndaı pikir bildirdi, dep habarlaıdy QazAqparat tilshisi.

«Negizi turǵyndar tarapynan bolatyn kedergiler kóp emes. Bul jerde Prezıdent aıtqandaı, salaǵa monopolııasyzdandyrý sharalary qajet. Múlik ıeleriniń birlestigin qurý kezinde monoplısterdiń jaǵynan kóptegen kedergilerdi baıqadyq. Mysaly, turǵyn úı salýshy kompanııalar páterlerdi jeke menshikke satqannan keıin de basqarýdy óz qolyna alady. Qurylys kompanııasynyń kepil merzimi bar. Sol merzim ótkenshe ózine baǵynyshty basqarýshy kompanııa arqyly turǵyn úıdi basqaryp, páter ıeleriniń nysannyń qandaı sapada salynǵany, ınjenerlik ınfraqurylymy qandaı deńgeıde tartylǵanyn kórýge múmkindik bermeıdi», - dedi ol.

Aıtýynsha, elde qurylyp jatqan múlik ıeleri birlestigi tóraǵalarynyń eń birinshi kezdesetin basty problemasy qazir osy bolyp otyr.

«Saldarynan jańa salynǵan úılerdiń turǵyndarynyń múlik ıeleri birlestigin qurýǵa murshasy bolmaıdy. Olar úıdiń negizgi tehnıkalyq qujattaryn alýdan bosaı almaı jatady», - dedi MIB tóraǵasy.

Aıta keteıik, Májilis energııa únemdeý týraly zań jobasyna Senat engizgen ózgeristerdi qabyldaǵan bolatyn. Sonyń aıasynda páter ıeleri kooperatıvteri taǵy bir jyl jumys isteıtin bolǵan edi.