Monopolıster de ákimder sekildi tutynýshy aldynda jyl saıyn esep beretin bolady - TMRA
ASTANA. QazAqparat -Monopolıster de ákimder sekildi tutynýshylar aldynda jyl saıyn esep beretin bolady. Bul týraly búgin Parlament Májilisindegi Úkimet saǵatynda Tabıǵı monopolııalardy retteý agenttiginiń tóraǵasy Murat Ospanov málim etti.
Agenttik tóraǵasynyń aıtýynsha, búgingi kúni vedomstvo arnaıy zań jobasyn ázirlegen. Zań jobasy tarıf belgileýdiń ashyqtyǵy, retteletin qyzmetter sapasyn arttyrý jáne qarajattyń maqsatty paıdalanýyn baqylaýdy kúsheıtý máselelerin qarastyrady.
«Bul rette birinshiden - ákimderdiń esep berýleri sekildi jarııa tyńdaýlardy jáne monopolısterdiń jyl saıynǵy mindetti esepterin ótkizýge qatań talaptar qoıýdy usynamyz. Sonymen qatar, elektrmen jabdyqtaý baǵalary ózgergen jaǵdaıda jarııa tyńdaýlar ótkizý engizilmek. Ekinshiden - monopolıster satyp alatyn taýarlar, jumystar, qyzmetter baǵalarynyń júıelengen tizbesin ázirleý arqyly satyp alý ashyqtyǵyn arttyrý qarastyrylady. Úshinshiden - retteletin naryq sýbektilerine jáne tabıǵı monopolııa sýbektilerine aldyn ala tólemaqy alýǵa tyıym salýdy usynamyz. Tórtinshiden - qyzmetke qosý kezinde monopolıster keltiretin kedergilerdi joıý. Bul rette monopolısterge veb-saıtta jeliler men jabdyqtar jumysynyń shamadan tys kóptigi, qýattardyń bolýy jáne jelilerdiń ótkizý qabileti týraly aqparatty toqsan saıyn ornalastyrýǵa qosymsha mindetter engizý usynylady», dedi Murat Ospanov.
