Monopolıster Almatydaǵy tutynýshylarǵa 29 mlrd teńgeni qaıtarady

ALMATY. QazAqparat - Monopolısterdiń tarıf smetalary men ınvestıtsııalyq baǵdarlamalarynyń oryndalýy týraly esepterin tekserý kezinde Tabıǵı monopolııalardy retteý komıtetiniń Almaty qalasy boıynsha departamenti birqatar zań buzýshylyqty anyqtady, dep habarlaıdy QazAqparat tilshisi.

Tarıf smetalary men ınvestıtsııalyq baǵdarlamalardy oryndamaǵan jáne esepterdi usynbaǵan 20 tabıǵı monopolııa sýbektisi ákimshilik jaýapkershilikke tartylyp, 34 mln teńge aıyppul salyndy.

Tutynýshylarǵa qaıtarylatyn jalpy soma 29 mlrd teńge. Onyń ishinde:

- magıstral qubyr júıeleri arqyly munaı aıdaý salasynda - 28,9 mlrd teńge;

- kirme joldar salasynda - 15,04 mln teńge;

- sýmen jabdyqtaý salasynda - 18,96 mln teńge;

- aǵyn sýlardy burý salasynda - 8,35 mln teńge;

- elektr qýatyn berý salasynda - 4,81 mln teńge;

- jylýmen jabdyqtaý salasynda - 11,97 mln.teńge;

-magıstraldyq jáne gaz taratý qubyrlary arqyly gaz tasymaldaý salasynda - 32,81 mln teńge.

Sondaı-aq, búgingi kúni birqatar tabıǵı monopolııa sýbektisine qatysty olardyń tarıf smetalaryn, ınvestıtsııalyq baǵdarlamalardy oryndamaǵany jáne esep bermegeni úshin tıisti sharalar qabyldanýda.