Monoqalalardyń damýy: Saranda jańa óndirister men jumys oryndary qurylyp jatyr
ASTANA. KAZINFORM — Saran qalasynda monoqalalardy damytý boıynsha respýblıkalyq semınar-keńes ótip jatyr, dep habarlaıdy Úkimettiń baspasóz qyzmeti.
Qaraǵandy oblysynda Premer-mınıstrdiń tapsyrmasy boıynsha ótip jatqan «Monoqalalardyń bolashaǵy: oń tájirıbe jáne turaqty damý» atty respýblıkalyq semınar-keńeske 20 monoqalanyń ákimderi, vıtse-mınıstrler men sarapshylar qoǵamdastyǵynyń ókilderi qatysty.
Prezıdent Qasym-Jomart Toqaevtyń monoqalalar ekonomıkasyn ártaraptandyrý jáne damytý jónindegi tapsyrmalaryn oryndaýǵa kóńil bólindi.
— Semınar barysynda monoqalalardyń damý tendentsııalary jáne ekonomıka qurylymyn nyǵaıtý salasyndaǵy ózekti mindetter talqylandy. Monoqalalardy ornyqty damytýdyń jol kartasyn qalyptastyrý taqyryptary kóterildi, Smart City tsıfrlyq sheshimderi men jobalaryn engizýdiń mańyzdylyǵy atap ótildi, shaǵyn ónerkásip qalalaryn ornyqty damytýdyń tabysty otandyq jáne halyqaralyq keısteri qaraldy. Bul turǵyda ındýstrııalyq aımaq qurý nátıjesinde monoqalalar qatarynan shyǵarylǵan jáne qazir ónerkásiptik qýaty artyp kele jatqan Saran qalasynyń oń tájirıbesi atap ótildi, — delingen habarlamada.
Osylaısha, Saranda qoldaý sharalarynyń nátıjesinde ekonomıkany ártaraptandyrýǵa yqpal etken Saran ındýstrııalyq aımaǵy quryldy. 2019-2024 jyldar aralyǵynda qalada ónerkásip óndirisiniń kólemi 5,6 ese ósti, óńdeý salasynyń úlesi 92%-ǵa jetti. Salyq túsimderi úsh ese ósti. Jańa zaýyttarda 2 myńnan astam jumys orny ashyldy, ári qaraıǵy jobalar taǵy 3,5 myńǵa jýyq jumys ornyn qamtamasyz etedi, bul jergilikti turǵyndardy da, basqa óńirlerdiń qyzmetkerlerin de tartady.
Jańa óndirister qurý jumyspen qamtýdyń ósýine jáne ShOB-ty damytýǵa, sondaı-aq qalalyq ınfraqurylym men turǵynúı qurylysyn jańǵyrtýǵa yqpal etedi. Bıyl qala ekonomıkasyna 76 mlrd teńgeden astam ınvestıtsııa tartý josparlanyp otyr. Jalpy, Qazaqstanda óńirlerdi qoldaýdyń júıeli sharalaryn júzege asyrý nátıjesinde monoqalalar sany 27-den 20-ǵa deıin qysqardy, bul iri óndiristerdiń jáne ekonomıkanyń ózge de túrli baǵyttarynyń ósýin bildiredi.
Semınar-keńes qorytyndysy boıynsha qatysýshylar Saran qalasyndaǵy birqatar ónerkásip jáne áleýmettik nysandardy aralady.
Qazirgi ýaqytta Qaraǵandy oblysynda tórt monoqala bar — Temirtaý, Shahtınsk, Abaı jáne Balqash, onda 340 myńǵa jýyq adam turyp jatyr, bul óńir halqynyń úshten birin quraıdy. Óńirdegi ónerkásip óndirisiniń jartysyna jýyǵy monoqalalar úlesine tıesili.
Buǵan deıin bıyl 6 monoqala men 17 shaǵyn qalada 42 joba júzege asyrylatyny aıtyldy.