Monoqalalar men óńirlerdi damytý baǵdarlamasyn iske asyrýda 13,8 mlrd. teńgeniń zańbuzýshylyqtary anyqtaldy
ASTANA. QazAqparat - QR Óńirlik damý mınıstrliginiń 2013-2017 jyldarǵa arnalǵan strategııalyq josparyn iske asyrý, «Óńirlerdi damytý» jáne «2012-2020 jyldary shaǵyn qalalardy damytý» baǵdarlamalaryn iske asyrýǵa bólingen respýblıkalyq bıýdjet qarajattaryn paıdalanýdy baqylaý barysyn baǵalaý qorytytyndysy shyǵaryldy, dep habarlady Esep komıtetiniń baspasóz qyzmetinen.
Mınıstrliktiń strategııalyq jospary tıisti deńgeıde iske asyrylmaǵan. «Óńirlerdi damytý» jáne «2012-2020 jyldary shaǵyn qalalardy damytý» baǵdarlamalaryn baǵalaý barysynda sharalardy oryndaýda jaýapty memlekettik jáne jergilikti atqarýshy organdarmen ózara árekettestiktiń mardymsyz bolǵany anyqtaldy. Jalpy alǵanda, jalpy somasy 13,8 mlrd. teńgege bıýdjettik jáne ózge de zańnamany buzýshylyqtar anyqtaldy», - delingen habarlamada.
Monoqalalardy damytý baǵdarlamasynda kózdelgen 4 nysanaly kórsetkishtiń 3-eýine qol jetkizilmegen. Sharalar josparynyń 18-tarmaǵynyń 6-ýy ǵana oryndalǵan. Baǵdarlamany iske asyrýǵa baǵyttalǵan qarajattyń jalpy kóleminen monoqalalar ekonomıkasyn ártaraptandyrý boıynsha 16 paıyzy ǵana paıdalanylǵan.
«Óńirlerdi damytý» baǵdarlamasy boıynsha Aqmola, Atyraý, Shyǵys Qazaqstan, Jambyl, Batys Qazaqstan jáne Qaraǵandy oblystarynda jergilikti bıýdjetten qosymsha qarjylandyrý bolmaǵandyqtan 9 joba iske aspaǵan.
QR Ulttyq ekonomıka mınıstrligine jol berilgen zańbuzýshylyqtardy joıý, zańnamany buzǵan laýazymdy tulǵalardyń jaýapkershiligin qaraý, basqa da tapsyrmalar berildi. Aqmola, Jambyl, Mańǵystaý jáne Qaraǵandy oblystary ákimderine 215,6 mln. teńge respýblıkalyq bıýdjet qarajatyn ornyna qaıtarý sharalaryn qabyldaý tapsyryldy.
