Monoqalada jańa sot ǵımaraty ashyldy - Almaty oblysy
TALDYQORǴAN. QazAqparat - Almaty oblysynyń Tekeli qalasynda jańa sot ǵımaraty qoldanysqa berildi. Nysannyń qurylysyna respýblıkalyq qazynadan 231 mln teńge qarjy bólingen. Ǵımarat tolyǵymen zamanǵa saı materıaldyq tehnıkalyq bazamen jabdyqtalǵan, dep habarlaıdy QazAqparat tilshisi.
Jańa ǵımaratta azamattyq jáne qylmystyq isterdi qaraıtyn eki sot zaly, sýdıalar kabıneti men oqý bólmesi qarastyrylǵan. Budan bólek, prokýratýra, qorǵaýshy jáne oblystyq sotpen onlaın rejıminde konferentsııa ótkizýge arnalǵan arnaıy bólmeleri de bar. Endi, turǵyndarǵa onlaın túrde de qyzmet kórsetiledi. Jalpy, qalalyq sotta jańa jyl bastalǵaly 90-nan asa qylmystyq is qaralǵan. Onyń teń jartysy medıatsııa tártibimen sheshilgen.
Tekeli qalalyq sotynyń tóraǵasy Ernar Qasymbekovtyń aıtýynsha, jańa nysan Elbasy saıasatynyń negizi ustanymy ashyqtyq, jarııalylyqty júzege asyrýǵa septigin tıgizbek. Munda qazir 3 sýdıa jáne 15 qyzmetker jumys isteıdi. Mekemeniń ashylý saltanatyna oblystyq sottyń tóraǵasy Meırambek Taımerdenov keldi.
Aıta ketý kerek, Tekeli qalasynyń sot qyzmetkerleri osy kúnge deıin 50-shi jyldary salynǵan eski ǵımaratta qyzmet etip keldi.
