Monıtorıngilik top elordanyń saýda, oıyn-saýyq ortalyqtaryn aralady
NUR-SULTAN. QazAqparat – Búgin Nur-Sultan qalasynyń birneshe saýda ortalyǵynda sanıtarlyq talaptardy saqtaýǵa úndeýge baǵyttalǵan aqparattyq túsindirý jumystary júrgizildi, dep habarlaıdy QazAqparat tilshisi.
«Bizdiń maqsat – saýda ortalyqtaryna kelýshiler men sonda jumys isteıtin adamdarǵa sanıtarlyq talaptardy saqtaýǵa qatysty túsindirý jumystaryn ótkizý. Biz sanıtarlyq talapty buzǵan adamdardy ustap alyp aıyppul salmaımyz, tek talapty buzbaýǵa shaqyramyz. Al hattama toltyryp, aıyppul salýmen arnaıy monıtorıngilik top aınalysady. Onyń quramynda quzyrly organ ókilderi bar. Elimizdiń bas sanıtar dárigeri bekitken ortaq sanıtarlyq talap bar, onda barlyǵy tizbektelip jazylǵan. Biz sony saqtaýǵa tıispiz jáne saýda ortalyqtary da erejege saı jumys isteýi kerek. Óz tarapymyzdan saýda men bıznestiń turalap qalmaýy úshin bar múmkindikti jasap jatyrmyz. Osy oraıda saýda jáne bıznes ókilderi de túsinistikpen qarap, tıisti talaptardy saqtaǵany jón», - dedi Nur-Sultan qalasy ákimdigine qarasty Qyzmet kórsetý salasy jáne saýdany damytý bóliminiń jetekshisi Rýslan Ydyrysov.
Elordalyqtardy sanıtarlyq talaptardy saqtaýǵa shaqyrý maqsatynda quramynda sanıtarlyq-epıdemıologııalyq qyzmettiń ókili, polıtsııa qyzmetkeri jáne qalalyq ákimdik ókili bar monıtorıngilik top 3 iri saýda ortalyǵyn aralap, túsindirý ótkizdi.
«Bizdiń saýda ortalyqta barlyq sanıtarlyq talap saqtalady. Árıne adamı faktorlar bolyp turady. ıAǵnı saýda ortalyǵyna maskamen kirip, birazdan soń sheship tastaıdy. Ondaı jaǵdaıda biz kelýshige maska taǵyp júrý kerektigin eskertemiz. Kelýshilerdiń arasynda men aýyryp júrgen joqpyn, sondyqtan maska taqpaımyn deýshiler de kezdesedi. Talap bárimizge ortaq, sondyqtan ondaı azamattarǵa ótinish aıtyp nemese túsindirý jumysyn ótkizgennen basqa amal joq», - deıdi elordadaǵy saýda ortalyǵynyń biriniń ákimshisi Larısa Potoký.
Buǵan deıin habarlaǵanymyzdaı, elordada tamaqtaný oryndarynyń sanıtarlyq talaptardy jıi buzatyny anyqtaldy.
