Monıtorıng toby Qyzylorda dárihanalaryna tekserý júrgizdi

QYZYLORDA. QazAqparat - Qyzylorda oblysynyń taýarlar men kórsetiletin qyzmetterdiń sapasy men qaýipsizdigin baqylaý departamenti №6, №4, №1 qalalyq emhanalarda, «SQ-Farmatsııa» jaýapkershiligi shekteýli seriktestiginiń qoımasyna jáne qalanyń 24 dárihanasynda monıtorıng júrgizdi, dep habarlaıdy QazAqparat.

Bul týraly óńirlik kommýnıkatsııalar qyzmetiniń aqparat alańynda ótken brıfıngte taýarlar men qyzmetterdiń sapasy men qaýipsizdigin baqylaý departamenti farmatsevtıkalyq baqylaý bóliminiń bastyǵy Nurbek Ádilhanov málimdedi.

«Monıtorıngtiń 4 kúniniń qorytyndysy boıynsha №6, №4, №1 qalalyq emhanalar joǵaryda kórsetilgen nozologııa boıynsha MÁMS júıesinde ambýlatorııalyq deńgeıde tegin dárilik zattarmen qamtamasyz etilgeni anyqtaldy. Qazirgi tańda 24 dárihananyń birneshe dárihanasynda keıbir dárilik zattar joq, degenmen dárilik zattar kún saıyn jetkizilýde», - dep atap ótti bólim basshysy.

Monıtorıng tobynyń jumysy 31 shildege deıin jalǵasady.