Mońǵolııanyń tuńǵysh prezıdenti: Nazarbaevtyń maqalasy bizdi tarıhqa jańasha qaraýǵa jeteledi
«Mońǵoldar men qazaqtar álemge kóshpendilerdiń sıqyrly órkenıetin tartý etken, ejelden tatý halyqtar. Zamannyń qazirgi ǵylymy bizdiń halyqtarymyzdyń tarıhty, dástúrdi, rýhanı biregeılikti, tildi birge damytqanyn dáleldep otyr. Bizdiń elderimiz birge memleketterdi irgesin qalap, ony órkendetý jolynda ter tókken», - dedi Pýnsalmaagıın Ochırbat.
Pýnsalmaagıın Ochırbat óz sózinde Qazaqstannyń Tuńǵysh Prezıdenti - Elbasy Nursultan Nazarbaevpen dos ekenin aıtyp ótti.
«Óziniń «Uly dalanyń jeti qyry» maqalasynda Nursultan Ábishuly kóshpendilerdiń órkenıetine, dala tarıhyna erekshe baǵa beredi. Bul qadam tarıhqa jańasha qaraýǵa jeteledi. Ol sonymen qatar, bolashaqty baǵdarlaýda baǵyt-baǵdar berip otyr. Qazirgi ýaqytta memleketter bir-birimen etene ómir súrip jatyr. Kórshiles memleketter ekonomıkany birge kóterip, saýda-naryqtyq qarym-qatynasyn retteýde. Qosymsha múmkindikterdi qarastyrýda», - dedi ol.
Mońǵolııanyń Tuńǵysh Prezıdenti Qazaqstan men Mońǵolııa tarıhty birge damytý isinde qazaqtar men mońǵoldar birlese kúsh salyp, kóshpendilerdiń mádenı qundylyqtaryn ǵasyrdan ǵasyrǵa alyp baratynyna senim bildirdi.
«Qazaqstan Respýblıkasy qazirgi ýaqytta kórshiles memleketterdiń ekonomıkasyna jaǵymdy jaǵynan yqpal ete alatyn memleketke aınaldy. Ortalyq Azııada da, Eýrazııalyq ekonomıkalyq odaq aıasynda yqpaly zor. Qazaqstan óziniń tarıhymen, jetistikterimen, ekonomıkalyq reformalarymen maqtana alatyn memleket. Osyǵan qaramastan, aýqymdy qadammen alǵa qaraı jyljyp bara jatqanyna qýanyshtymyz», - dep sózin túıdi Pýnsalmaagıın Ochırbat.
Eske sala ketsek, elordada «Uly dala» ІV gýmanıtarlyq ǵylymdar forýmy ótip jatyr. Sharaǵa «Túrki órkenıeti: túp tamyrynan qazirgi zamanǵa deıin» taqyrybyna arnalyp otyr. Forýmda qazaqstandyq ǵalymdarmen birge Eýropa, Azııa men Amerıka qurlyǵynyń 21 elinen 250-ge jýyq tanymal ǵalymdar men belgili memleket, qoǵam qaıratkerleri qatysýda.
