Mońǵolııanyń esirtkige qarsy polıtsııasy qazaqstandyq áriptesterinen tájirıbe bólisýdi surady

NUR-SULTAN. QazAqparat - Qazaq-mońǵol konsýldyq konsýltatsııalary sheńberinde Qazaqstan men Mońǵolııanyń esirtkige qarsy vedomstvolary basshylarynyń kezdesýi ótti. Bul týraly QR ІІM Esirtki qylmysyna qarsy is-qımyl departamentinen málim etti, dep habarlaıdy QazAqparat.

«Mońǵolııa Ádilet jáne ishki ister mınıstrligi Esirtkige qarsy departamentiniń dırektory J. Erdenebold elimizdiń esirtkiniń zańsyz aınalymyna qarsy qyzmetine joǵary baǵa berdi. Sondaı-aq esirtkilerdiń zańsyz aınalymy Mońǵolııa úshin salystyrmaly túrde jańa problema ekenin atap ótti», - delingen baspasóz máslıhatynda.

Elge sıntetıkalyq esirtkiler irgeles memleketterden, sondaı-aq poshta jóneltilimderi arqyly jetkiziledi. Bul, esirtki bıznesine qarsy árekettiń álemdik tájirıbesin belsendi zerdeleýdi qajet etedi.

«Esirtkige qarsy qazaqstandyq qurylymdardyń esirtki bıznesine qarsy kúrestegi úlken tájirıbesin eskere otyryp, mońǵol tarapy normatıvtik-quqyqtyq, sol sııaqty jedel sıpattaǵy aqparatpen ózara almasýdy uıymdastyrýdy, sondaı-aq Qazaqstan Іshki ister mınıstrliginiń oqý oryndarynda Mońǵolııanyń esirtkimen kúres polıtseılerin oqytý múmkindigin qarastyrýdy usyndy», - dedi ІІM departamentinen.