Mońǵolııanyń burynǵy eki Úkimet basshysy qamaýǵa alyndy
BAıAN-ÓLGEI. QazAqparat - Mońǵolııanyń eki birdeı eks-premer-mınıstri sybaılas jemqorlyqqa qatysy bar degen kúdikpen qamaýǵa alyndy, dep habarlaıdy osy eldegi «QazAqparat» HAA-nyń menshikti tilshisi.
Mońǵolııanyń Sybaılas jemqorlyqqa qarsy is-qımyl agenttigi burynǵy úkimet basshylary Sanjaagıın Baıar men Chımedıın Saıhanbılegti 10 sáýir kúni qamaýǵa alǵan bolatyn. Olar «Oıýtolgoı» jobasy boıynsha el úkimeti men «Ivanhoe Mines Mongolia Inc», «Ivanhoe Mines Limited» jáne «Rio Tinto International Holdings Limited» kompanııalarynyń arasynda 2009 jylǵy 6 qazandaǵy ınvestıtsııalyq kelisim jáne aktsıonerler týraly shart jasalǵanda, 2015 jyldyń 18 mamyrynda jerasty ken oryndaryn ıgerý jáne qarjylandyrý josparyn bekitkende ózderiniń ókilettigin jáne mansabyn paıdalanyp, zańsyz sheshimder qabyldap, úkimetke zııan keltirgen bolýy múmkin degen kúdikke ilingen.
Búgin sot otyrysynda olardy qamaýda ustaý ýaqytyn 30 kúnge uzartý týraly sheshim qabyldandy.
Kúdiktiler sot májilisine onlaın rejıminde qatysqan. Bul týraly úkimet basshysy qyzmetin atqarǵan Sanjaagıın Baıardyń aqtaýshysy A.Arıýnaa BAQ ókilderine málim etken.
«Sot otyrysynda meniń qorǵaýymdaǵy Sanjaagıın Baıardy 1 aıǵa qamaý týraly sheshim shyǵaryldy. S.Baıardy 10 sáýir kúni 18 saǵatta sottyń ruqsatynsyz tutqyndady. Tutqyndaýǵa negizgi sebep - qylmys oqıǵalarynyń izin, dálelin joıýdyń aldyn alý. Men buǵan qarsylyq tanytyp, shaǵymdandym. «Oıýtolgoı» kelisim sharttaryna baılanysty barlyq materıaldar qazir Kabınet Hatshylyǵynyń muraǵaty, Parlament arhıvteriniń jáne Ulttyq Qaýipsizdik Keńesiniń muraǵattarynyń barlyǵynda saqtaýly. Osyǵan qaramaı atalǵan kelisim shartqa baılanysty materıaldardy joıýy, tasymaldaýy jáne qaıtadan zań buzýy múmkin degen jeleýmen tutqyndaýǵa (Sanjaagıın Baıardy - red.) quqyqtyq negiz joq», - dedi ol.
Al eks-premer Sanjaagıın Baıar: «Búgin meni 1 aıǵa qamaýǵa alǵany mańyzdy emes. Mańyzdysy - álem elderiniń aldynda eki birdeı burynǵy úkimet basyshysyn qamaýǵa alý arqyly mońǵol eliniń bet-bedeliniń túsýi. Osydan soń «Oıýtolgaı» aktsııasynyń quldyraý máselesi týyndaýy múmkin. Bul Mońǵolııa ekonomıkasyna keri áser etedi. Aldymen osy jaǵyn jaqsylap oılańyzdar», - dedi.
Esterińizge sala keteıik, Sanjaagıın Baıar 2007-2009 jyldary Mońǵolııa Úkimetiniń basshysy bolyp qyzmet etse, Chımedıın Saıhanbıleg 2014 - 2016 jyldary el úkimetin basqarǵan.
Qýat Ýathan
