Mońǵolııanyń birqatar sheneýnigi offshordaǵy baılyqtarynan bas tartty
Mońǵolııanyń sybaılas jemqorlyqqa qarsy kúres jónindegi zańy osyǵan mindettegen edi. Mońǵolııa azamattary offshorlyq aımaqta ashylǵan bank shottaryn jabý, bankte saqtalǵan qarajattarynan bas tartý, jyljymaly jáne jyljymaıtyn múliktiń menshiktik quqyǵyn satý, berý, úles qosý arqyly qurylǵan zańdy tulǵanyń qyzmetin toqtatý, óz quqyqtaryn satý nemese aýdarý, ıelikten shyǵarý boıynsha aqparatty 2018 jyldyń 6 sáýirine deıin málimdeý kerek edi. Osy ýaqyt ishinde Parlamenttiń 2 múshesi, Mońǵolbankiniń 1 laýazym ıesi ózderiniń qatysy bar tulǵaǵa tıesili offshorlyq aımaqta tirkeýli kompanııasynyń aktsııalaryn 2015-2017 jyldary basqa tulǵalarǵa aýdarǵany jaıly habarlady.
Sonymen qatar, Polıtsııa bas basqarmasyna enshiles uıymnyń 1 basqarma múshesi óz ıeligindegi 3 shottyń jabylǵanyn tirketti. Budan basqa offshorlyq aımaqqa jatatyn syrt elderde resmı fýnktsııalardy júzege asyrý, bilim alý, medıtsınalyq kómek jáne qyzmet kórsetý maqsatynda bankterge esepshot ashqan, qarajat saqtaǵan, jyljymaly jáne jyljymaıtyn múlik ıelengen 16 laýazymdy tulǵa Sybaılas jemqorlyqqa qarsy agenttikke jazbasha túrde habarlama joldady.
Eske sala keteıik, Mońǵolııa Prezıdenti Haltmaagıın Battýlga saılaýaldy baǵdarlamasynda offshor aımaqtaǵy jasyryn qarajattardy elge qaıtaryp ákelýge atsalysýǵa ýáde bergen bolatyn.
Qýat ÝATHAN