Mońǵolııanyń 5 azamaty Qazaqstanda jazasyn ótep jatyr
NUR-SULTAN. QazAqparat – QR Parlamenti Májilisiniń jalpy otyrysynda «Qazaqstan men Mońǵolııa arasyndaǵy sottalǵan adamdardy berý týraly shartty ratıfıkatsııalaý týraly» zań jobasy maquldandy, dep habarlaıdy QazAqparat tilshisi.
Zań jobasy 2018 jyly naýryzda Astanada jasalǵan shartty ratıfıkatsııalaýǵa baǵyttalǵan. Qujat eki el arasyndaǵy quqyqtyq qatynasqa qorytyndy jasaıdy. Shart sottalǵan adamnyń jazasyn óz elinde óteýdi qamtamasyz etpek. Qujat boıynsha sottalǵan adamdy berý úshin tıisti negizder eskerilgen. Bul turǵyda adam qabyldaýshy taraptyń azamaty bolýy, jasalǵan áreket eki jaqtyń zańy boıynsha qylmys dep sanalýy, ótelmegen jaza keminde bir jyldy quraýy kerek.
«Árıne, berýden de bas tartý negizderi kózdelgen. Mysaly, el egenmendigine, qaýipsizdigine, qoǵamdyq tártipke nuqsan keltiretin bolsa, sottalǵan adam qylmystan kelgen zalalyn ótemese nemese bizdiń azamattarǵa qaryz bolsa. Qazirgi tańda Mońǵolııada jazasyn ótep jatqan Qazaqstan azamattary joq. Al elimizde Mońǵolııanyń 5 azamaty jazasyn ótep jatyr», - dep naqtylady QR Bas prokýrorynyń orynbasary Marat Ahmetjanov.
Onyń sózine qaraǵanda, osyǵan uqsas shartty elimiz 22 memleketpen bekitken. Jaqynda osyndaı qujatqa Ózbekstan, Vetnam, Kıpr, Argentına, Domınıkan jáne basqa da eldermen qol qoıý josparlanǵan.
