Mońǵolııanyń Uly Memlekettik Hýralynyń tóraǵasy Qazaqstanǵa resmı saparmen keldi
ASTANA. KAZINFORM — Májiliske Mońǵolııanyń Uly Memlekettik Hýralynyń tóraǵasy Dashzegvıın Amarbaıasgalan bastaǵan delegatsııa keldi. Májilis tóraǵasy Erlan Qoshanovpen kezdesýde taraptar parlamentaralyq baılanysty nyǵaıtý jaıyn talqylap, yntymaqtastyq týraly memorandýmǵa qol qoıdy. Bul týraly QR Parlamenti Májilisiniń baspasóz qyzmeti málim etti.
— Elderimizdiń arasyndaǵy qarym-qatynas qarqyndy damyp keledi. Prezıdent Qasym-Jomart Toqaevtyń Mońǵolııaǵa byltyrǵy memlekettik sapary óte nátıjeli boldy. Kóshbasshylarymyzdyń arqasynda ekijaqty baılanysymyz strategııalyq seriktestik deńgeıine kóterilip, túrli salany qamtıtyn 11 qujatqa qol qoıyldy. Búgin biz qol qoıatyn parlamentterimiz arasyndaǵy yntymaqtastyq týraly memorandým áriptestigimizdi jańa beleske kóteredi dep senemin, — dedi Májilis spıkeri.
Óz kezeginde Uly Memlekettik Hýral tóraǵasy tsıfrlandyrý, jasandy ıntellektini damytý, ekologııa, aýyl sharýashylyǵy sııaqty salalar boıynsha zań shyǵarýda tájirıbe almasýǵa ózara úlken qyzyǵýshylyq bar ekenin atap ótti.
Parlamentaralyq yntymaqtastyqty damytý jaıyn sóz etken eki tarap dostyq toptarynyń jumysyn kúsheıtý, turaqty dıalogty salalyq komıtetter aıasynda da yntalandyrý jóninde ýaǵdalasty. Parlamentaralyq Odaq pen EQYU Parlamenttik Assambleıasy sııaqty kópjaqty alańdarda odan ári birlese jumys isteý máselelerin de qozǵady. Sondaı-aq parlamentshiler týrızm baǵytyndaǵy áriptestikti nyǵaıtý, eki eldiń ekonomıkalary úshin kadrlar daıarlaý jáne tehnologııalardy damytý múmkindikterin talqylady.
Kezdesý qorytyndysynda taraptar Parlament Májilisi men Uly Memlekettik Hýral arasyndaǵy yntymaqtastyq týraly memorandýmǵa qol qoıdy. Qujatqa sáıkes, taraptar óz quzyretteri aıasynda saıası, saýda-ekonomıkalyq, ǵylymı-tehnıkalyq, áleýmettik-mádenı, gýmanıtarlyq, basqa da salalarda, sondaı-aq ekonomıkany tsıfrlandyrý, ınnovatsııalardy damytý men engizý isinde Qazaqstan Respýblıkasy men Mońǵolııa yntymaqtastyǵyn nyǵaıtýǵa jáne damytýǵa járdemdesýge mindettenedi. Sonymen birge Májilis alańynda Shyǵys Qazaqstan oblysy men Qobda (Hovd) aımaǵy arasynda baýyrlastyq qatynas ornatý týraly memorandýmǵa qol qoıyldy.
Eske sala keteıik, buǵan deıin Erlan Qoshanov Ózbekstannyń Olıı Májilis Senatynyń tóraǵasymen kezdeskenin jazǵan edik.