Mońǵolııanyń teri óńdeý salasy joǵary deńgeıde — Ermek Kenjehanuly

ASTANA. KAZINFORM — 2025 jyly qol qoıylǵan memorandým nátıjesinde birlesken jumystar atqarylyp jatyr. Bul jóninde Aýyl sharýashylyǵy vıtse-mınıstri Ermek Kenjehanuly Qazaqstan-Mońǵolııa bıznes forýmynda málimdedi. 

— Byltyr Qazaqstan men Mońǵolııanyń aýyl sharýashylyǵyna jaýapty mınıstrlikteri memorandýmǵa qol qoıǵan. Qujatqa saı, óńdeý salasynda birge jumys isteımiz. Sol kelisimshart aıasynda bizdiń delegatsııa atalǵan elge baryp, birneshe kezdesý ótkizdi. Óńdeý kásiporyndarynyń jumysymen tanysyp, zerttedi. Bizdiń bıznes ókilderi de atalǵan elge baryp qaıtty. Búgingi forým aıasynda da kelissózder júrip jatyr, — dedi ol.

Ermek Kenjehanulynyń sózinshe, elimiz Mońǵolııanyń teri óńdeý sektoryn joǵary baǵalaıdy.

— Mońǵolııanyń teri óńdeý salasy joǵary deńgeıde. Biz qazir osy baǵytty tereńirek zerttep, eki jaqtyń bıznes ókilderin baılanystyryp jatyrmyz. Al mońǵol tarapy bizdiń mal sharýashylyǵyna qyzyǵýshylyq tanytyp otyr. Eger ınvestıtsııa quıamyn degen kásipkerler bolsa, barlyq jaǵdaıyn jasaýǵa daıynbyz, — dedi vıtse-mınıstr.

Aıta keteıik, buǵan deıin Qazaqstan Mońǵolııaǵa vagon eksporttaıtynyn jazǵanbyz.