Mońǵolııalyq ónerpazdar «Álııa gúli» festıvaline qatysý úshin alty kún jol júrdi
AQTÓBE. QazAqparat - Aqtóbede «Álııa gúli» dostaryn qarsy alady» atty VII halyqaralyq festıval ótti. Bıyl Mońǵolııa bıshileri festıvalge birinshi ret qatysty, dep habarlaıdy QazAqparat tilshisi.
Eki jylda bir ret ótetin «Álııa gúli» dostaryn qarsy alady» festıvaline bıyl 18 bı ujymynan 300 bıshi qatysty. Balalar men jasóspirimder festıvaline Túrkııa, Reseı, Mońǵolııa men elimizdiń birneshe oblysynan ónerpazdar keldi. Olar aldymen Keńes Odaǵynyń batyry Álııa Moldaǵulovanyń týǵan jeri Bulaq aýylyna bardy. Keıin Qobda aýdanynda kontsert uıymdastyryp, «Álııa gúli» bı ujymy óz dostaryna kontserttik baǵdarlama usyndy.
«Bıyl festıval Rámizderdiń 25, Mánshúk Mámetova men Hıýaz Dospanovanyń týǵanyna 95 jyl tolýyna, Aqtóbeniń 85 jyldyǵy men «EKSPO-2017» kórmesine arnalyp otyr. Festıvalge alǵash ret Mońǵolııanyń ónerpazdary keldi. Bıshilerdi «Álııa gúli» ujymy Túrkııada ótken festıval kezinde shaqyrǵan. Olar shaqyrtýymyzdy qabyldap, ulttyq bılerin ala keldi»,- dedi qalalyq mádenıet jáne tilderdi damytý bóliminiń basshysy Altynaı ıÝsýpova.
Mońǵolııadan barlyǵy 12 bıshi men úsh jetekshi keldi. Selengınskıı aımaǵynan kelgen «Erdenes-5» bı ujymy festıval kezinde úsh ulttyq, eki zamanaýı bıdi usyndy. Bı ujymynyń dırektor Baıgalmaa Tseveendorjdyń aıtýynsha, olar Qazaqstanǵa alǵash ret kelip otyr.
«Qazaqstan, Aqtóbe bizge qatty unady. Qazaqstannyń halqy qonaqjaı, aqjarqyn. Bizdi óte jaqsy qabyldady. Mońǵolııa qazaqtarymen jaqyn turatyn aýyldar Naýryz merekesi týraly jaqsy biledi. Merekede dastarhan jaıylyp, ulttyq taǵamdar usynylady»,- dedi Baıgalmaa Tseveendorj.
Aqtóbeden shaqyrý alǵan Mońǵolııa bıshileri alys saparǵa shyqpas buryn sol eldegi Qazaqstan elshiligine baryp, týra joldy suraǵan. Poıyz, ushaqpen jetý ónerpazdar úshin tym qymbatqa soqqan soń Selengıskıı aýylynan Ulanbatyrǵa poıyzben jetken bıshiler keıingi joldy avtobýspen jalǵastyrǵan. 6 myń shaqyrymdy 6 kúnde júrip ótti. Mońǵol ónerpazdary aldymen Astanaǵa baryp, keıin Aqtóbege keldi.
«Aqtóbege kelip, Álııa Moldaǵulovanyń týǵan jerin, mýzeıin kórdik. Qalaǵa kelgen soń bizdi meshitke apardy. Aqtóbe óte ádemi qala. Bizdi shaqyrǵanda qýana qabyldaǵan edik. Balalarymyz dán rıza. Eger múmkindik bolsa taǵy da kelemiz. Bı ujymynyń Aqtóbege kelýine gýbernatorymyz, ata-analar kómektesti»,- dedi Baıgalmaa Tseveendorj.
