Mońǵolııalyq qazaq mınıstr Qazaqstannan kelgen bıznes-delegatsııany qabyldady
ASTANA. QazAqparat - Búgin Ulanbatyrda Qazaqstan Respýblıkasynyń «KAZAKH INVEST» ulttyq kompanııasy men Mońǵolııanyń ulttyq saýda-ónerkásiptik palatasynyń Mońǵolııadaǵy QR elshiliginiń yqpalymen birlese uıymdastyrǵan qazaqstandyq óndirýshilerdiń saýda mıssııasy ótti, dep habarlaıdy «QazAqparat» HAA.
Ulttyq kompanııa málimetinshe, transformatorlar, kúzet júıesi men órt sóndirý, akkýmýlıator batareıasy, vakýýmdy sóndirgishter, jylýmen qamtý qubyrlary, germetıka, tereze jáne esik fýrnıtýralary, talshyqtas tsementter, dári-dármek, qatparjáshik, as jáne tehnıka tuzdary, balmuzdaq, maı ónimderin óndiretin 14 óndirýshi Mońǵolııanyń 100-ge jýyq kóterme saýda jáne dıstrıbıýtorlyq kompanııalarynyń ókilderimen óz ónimderin jetkizý týraly kelissózder júrgizdi.
«Mońǵolııa-Qazaqstan» bıznes forýmnyń maqsaty - eki el arasyndaǵy bıznesti jaqyndatý. Búgin atalǵan salalardan basqa, ýran, altyn óńdeý baǵyttary boıynsha yntymaqtastyq áleýetin arttyrý mańyzdy, qurylys, qaýipsizdik máselelerin sheshý, turǵyn úı kommýnaldyq sharýashylyǵy salalaryndaǵy Qazaqstannyń tájirıbesi mońǵol tarapyna óte qyzyqty», - dedi Mońǵolııadaǵy Qazaqstan Respýblıkasynyń Tótenshe jáne Ókiletti elshisi K.Qobylandın.
«Qazaqstandyq delegatsııamen kezdeskenimizge óte qýanyshtymyz. Mońǵolııada qurylys kólemi artyp keledi. Árıne jeke qurylystar basym, alaıda bıýdjettik qurylystar da salynyp jatyr. «Mońǵolııa-Qazaqstan» bıznes-forýmynyń ótkizilýi - ekijaqty yntymaqtastyqty nyǵaıtýdyń taǵy bir amaly, eki el arasyndaǵy taýar aınalymyn tabysty arttyrýdyń kepili. Mońǵol kompanııalarymen baılanys ornatýdaǵy isterińizge sáttilik tileımin. Men óz tarapymnan qazaq halqymen baılanysty damytýǵa qoldaý kórsetetin bolamyn», - dedi Mońǵolııanyń qala qurylysy jáne qurylys mınıstri Bedelhan Havdıslam (shyǵý tegi boıynsha - etnıkalyq qazaq).
