Mońǵolııalyq boksshy Beknur Qalı qazaqstandyq qarsylastary týraly aıtty
ASTANA. KAZINFORM - Bokstan Mońǵolııa quramasynyń múshesi, ulty qazaq Beknur Qalı Azııa chempıonatyndaǵy qarsylastary jóninde áńgimelep berdi.
Bul jóninde Qazaqstan boks federatsııasy málim etti.
- Men tarıhı otanymda birneshe márte oqý-jattyǵý jıynynda boldym. Qazaqstandyq bylǵary qolǵap sheberleriniń barlyǵyn tanımyn. Olarmen qarym-qatynasym jaqsy. Meniń salmaǵymda Qazaqstan atynan Aıbek Oralbaı synǵa túsedi. Ekeýimiz áli oqý-jattyǵý jıynynda kezdesken joqpyz. Aıta ketsem, bıylǵy qurlyqtyq dodada ulty qazaq tórt boksshy bir salmaqta synǵa túsýge múmkindik aldyq. Men jáne Aıbekten ózge Danabek Baıqonys (Qytaı) jáne Arman Mahanov (Ózbekstan) syndy boksshylar jarysqa keldi. Byltyr elordada jarysqa qatystym. Qazaqstandyq bylǵary qolǵap sheberleriniń oqý-jattyǵý jıynynda boldym, - dedi ol.
Sondaı-aq mońǵolııalyq boksshy Astana qalasynda boksqa jasalǵan qoldaý joǵary deńgeıde ekenin atap ótti.
- Ózime Qazaqstanda jattyǵý jasaǵan unaıdy. Jalpy, Qazaqstan boksy álemde aldyńǵy qatarda keledi. Men úshin alda úlken josparlar bar. Endigi kezekte Azııa oıyndaryna jan-jaqty ázirlik jasaýdy aldyma maqsat etip otyrmyn. Alǵan jaraqatyma baılanysty qurlyqtyq dodaǵa daıyndyǵym óz deńgeıinde bolǵan joq, - dedi Beknur Qalı.
Aıta ketsek, Mońǵolııa astanasy Ulanbatyr qalasynda World Boxing aıasyndaǵy 2026 jylǵy Azııa chempıonaty ótip jatyr. Qurlyqtyq dodada 10 sáýirde máresine jetedi.
