Mońǵolııalyq ánshi qazaq, qyrǵyz, armıan ártisterimen kollaboratsııa jasaǵysy keledi

ASTANA. KAZINFORM – Erteń Azııa ónerpazdarynyń basyn qosatyn Silk Way Star baıqaýy bastalady. Dál qazir elordada qatysýshylar qyzý daıyndalyp jatyr. 12 memleketinen kelgen ónerpazdar ózara baq synap, 22 qarasha kúni jeńimpazdy anyqtamaq.

3 aıǵa sozylatyn dodada Mońǵolııanyń abyroıyn qorǵaıtyn Mıshel Djozef «Búgin LIVE» stýdııasyna qonaq bolyp, óz áserimen bólisti.

— Eń aldymen, osyndaı aýqymdy jobany uıymdastyrǵan barlyq jandarǵa shyn júrekten alǵys aıtqym keledi. Sebebi mundaı ıdeıalar bizdi biriktiredi. Bul — óte mańyzdy ári kólemdi joba. Men óz shyǵarmalarymdy ózim jazamyn. Ánderimniń ishinde mońǵol ulttyq mýzykasynyń elementteri bar. Sol sebepti meniń týyndylarym basqa memleketterdiń tyńdarmandaryna da qyzyqty bolady degen úmittemin, — deıdi Silk Way Stars jobasynyń qatysýshysy.

Mońǵolııalyq ánshi qatysýshylarmen áli tolyq tanysyp úlgermegenin aıtady. Degenmen, keı qarsylastarymen jaqyn dostasyp úlgeripti.

— Qazir jobada naǵyz qarbalas kezeń. Qatysýshylarmen endi-endi tanysyp jatyrmyz. Ókinishke qaraı, bárimen uzaq sóılesýge ýaqyt jetpeı jatyr. Degenmen, osy az ýaqyttyń ishinde qyrǵyzstandyq qatysýshymen jaqsy dos bolyp úlgerdik. Onyń esimi de erekshe. Taǵy bir qyzyǵy — ekeýimizdiń de mamandyǵymyz bir. Biz psıhologpyz, — deıdi Mıshel Djozef.

Ónerpaz qazaqstandyq, qyrǵyzstandyq jáne armenııalyq ánshilermen birge kollaboratsııa jasaǵysy keletinin jasyrmady.

— Eger múmkindik týsa, Qazaqstan, Qyrǵyzstan jáne Armenııa elderiniń ártisterimen birlesip kollaboratsııa jasaýǵa daıynmyn. Sebebi bul elderdiń mýzykasy maǵan óte jaqyn ári áýezi erekshe unady, — deıdi ol.

Joba qatysýshysy daıyndyq barysynda alǵan áserimen de bólisti.

— Bul joba — jaı ǵana báıge emes. Munda shyǵarmashylyqpen qatar, halyqtar arasyndaǵy dostyqty nyǵaıtyp jatyrmyz. Mysaly, daıyndyq kezinde armenııalyq ártistiń áýenin estip qaldym. Shynymdy aıtsam, qatty áser aldym, áni keremet eken, — deıdi ánshi.

Mıshel Djozef ánshi bolýdy armandamaǵanyn da jasyrmaı aıtty.

— Negizinde bala kezimde ánshi bolýdy armandaǵan joqpyn. Bastapqyda dáriger-psıholog bolǵym keldi. Biraq 16 jasymda «Mońǵolııa daýysy» saıysyna qatysyp, sol sátten bastap mýzykadaǵy jolym bastaldy, — deıdi stýdııa qonaǵy.

Aıta keteıik, birneshe kún buryn túrkimenstandyq qatysýshy «Búgin LIVE» stýdııasyna qonaq bolǵan edi.