Mońǵolııadan zańsyz ákelingen kólikter ıelerine qaıtaryldy

ASTANA. QazAqparat - Bas kólik prokýratýrasy Memlekettik kirister jáne Іshki ister organdarynyń elge Reseı-Mońǵolııa shekarasy arqyly jetkizilgen kólikterdi ustap, ýaqytsha saqtaý qoımalaryna jiberý isiniń zańǵa sáıkes oryndalýyn tekserdi, dep habarlaıdy qadaǵalaýshy organnyń baspasóz qyzmeti.

«Atalǵan avtokólikter 2014-2015 jyldary Qazaqstan shekarasyna jetkizilip, Reseıdiń keden organdarynda jeke qoldaný úshin dep tirkelgen. Belgilengen merzim aıaqtalǵan soń kólikter keden aýmaǵynan ketpegendikten, reseılik tarap kólikterdiń naqty turǵan jerin anyqtaý úshin Qazaqstannyń Memlekettik kirister komıtetine habarlasqan. Belgili bolǵandaı, avtokólikter Іshki ister organdarynda jalǵan keden deklaratsııasymen tirkelip, birneshe ret satylyp úlgergen. Osyndaı 805 kólik tirkeldi», delingen habarlamada.

Memlekettik kirister jáne ákimshilik polıtsııa komıtetteri kólikterdiń qazirgi ıelerinen keden bajyn alý úshin olardy ustaı bastaǵan. Tekseris kezinde ýaqytsha saqtaý qoımasyna 32 avtokólik jiberildi.

Budan bólek, ústimizdegi jyldyń 19 shilde kúni Bas prokýratýra Іshki ister organdarynda kólik quraldaryn tirkeý kezinde Qylmystyq kodekstiń 361-baby 2-bóliginesáıkes  qyzmettik laýazymdy asyra paıdalaný deregi boıynsha sotqa deıingi tergeý amaldaryn tirkedi. Sotqa deıingi tergeý Sybaılas jemqorlyqqa qarsy qyzmet organyna tapsyryldy.

Buǵan deıin Qazaqstan joldarynda keden zańnamasynyń normalaryn buzý arqyly Mońǵolııa aýmaǵynan jetkizilgen avtokólikterdiń az emestigi aıtylǵan edi. Zań buzýshylar Іshki ister organdaryna tirkelý úshin jalǵan qujattardy paıdalanǵan.