Mońǵolııadan álemdik sahnaǵa deıin: alǵashqy azııalyq vokaldyq megajobanyń jeńimpazy týraly ne bilemiz
ASTANA. KAZINFORM – Ótken aptada elordada «Silk Way Star» vokaldyq megajobasy aıaqtaldy. Grand-fınalda mońǵol ókili, jeńimpaz dástúrli ýrtyn-dýýdy zamanaýı mýzykalyq janrlarmen úılestiretin tanymal ánshi jáne kompozıtor Mıshel Djozef jeńiske jetti. Onlaın daýys berýge 508 myńnan astam adam qatysty, dep habarlaıdy Kazinform.
Mıshel jobada alǵashqy epızodtan bastap ózin belsendi qatysýshy retinde kórsetti, sahnada dástúr men zamanaýılyqty úılestire bildi.
Onyń óner kórsetýi — ánderdi oryndaýy, sahnadaǵy beınesinde únemi ulttyq bolmys tanylyp turdy.
Ártis Mıshel Djozef — shyn esimi ekenin atap ótti. Ánshiniń tegi — aralas: onyń anasy mońǵol, ákesi cheh. Ol Mońǵolııada dúnıege kelgen.
Jeńimpazdyń anasy Dagıımaa Badamhýý qyzy fınalda óner kórsetkennen keıin, emotsııasyn jasyrmady. Ol Qazaqstan jyly qarsy alǵanyn, kókeıinde erekshe atmosfera qalǵanyn ári jas oryndaýshylarǵa osyndaı úlken sahnada óner kórsetý múmkindigin bergeni úshin alǵysyn aıtty.
Mıshel Djozef mońǵol jáne aǵylshyn tilderinde án aıtyp, ulttyq dybystaýdy pop, R& B jáne fank sııaqty zamanaýı janrlarmen úılestiredi. Joba aıasynda ol sondaı-aq «Qaratorǵaı» halyq ánin qazaq tilinde oryndady.
Mıshel qazaq tilinde án shyǵarýdy josparlap otyrǵanyn jáne jańa materıaldarmen jumys istep jatqanyn aıtty. Qazaq tili men mádenıeti ózine jaqyn, jáne ol qazaqstandyq tyńdaýshylaryna arnalǵan kompozıtsııa shyǵarǵysy keledi.
Jeńisinen keıin ánshi jankúıerlerine úndeý tastap, joba týraly oıymen bólisti.
— Raqmet saǵan, Silk Way Star. Jaryǵyń galaktıkalar men ǵalamdar arqyly sheksiz saıahattap, qaıda barsa da armandardy jandyrsyn. Qazaqstan men Mońǵolııa arasyndaǵy jarqyn mádenı dostyq nyǵaıyp, halyqtarymyzdy óner, mura jáne ózara qurmet arqyly biriktire bersin, — dep jazdy Mıshel áleýmettik jelide.
Ártistiń shyǵarmashylyq portfolıosyna tanymal telejobalarǵa qatysý kiredi:
* «My Voice» (2016), onda ol úshinshi oryn aldy;
* «Your Sounds Familiar», onda ánshi «Úzdik qatysýshy» syılyǵyn aldy;
* «That’s My Jam», qonaq oryndaýshy retinde óner kórsetti.
Mıshel Djozef óz shyǵarmashylyǵymen áleýmettik jelilerde belsendi túrde bólisip otyr. Onyń Instagram-da 152 myń oqyrmany, al YouTube arnasynda 20 700 jazylýshysy bar.