Mońǵolııadaǵy juttan aýyrtpalyq kórip otyrǵan qazaqtardy elge kóshirip ákelý qajet -A. Momyshev

Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Amangeldi Momyshev osyndaı málimdeme jasady, dep habarlaıdy QazAqparat.

Sóz basynda qystyń qaharly aıazy saldarynan Mońǵolııa jerinde oryn alǵan gýmanıtarlyq apatqa toqtalǵan depýtat, aqpandaǵy juttyń búkil halyqqa, onyń ishinde negizgi kúnkórisi malmen baılanysty qandastarymyzdyń basyna úlken náýbet ákelgenin atap ótti. Resmı derekterge súıengen depýtattyń aıtýynsha, aıaz saldarynan Mońǵolııada 3-3,5 mln. bas mal qyrylǵan. Osyǵan oraı, kómek qoldaryn sozǵan kórshiles Reseı 13 mln. rýblge 34 vagon, Qytaı eli 1,5 mln. dollarǵa mal azyǵyn jóneltipti. «Qazaqstannyń kómegi sol bolsyn, Mońǵolııadaǵy qandastarymyzdy elimizge kóshirip ákeleıik. Shyndyǵynda, kúnkórisiniń negizgi kózi bolyp otyrǵan malynan aıyrylǵan otandastarymyzdy osynaý aýyr kezeńde elge kóshirip alsaq - sonyń ózi úlken kómek bolar edi», dedi A. Momyshev.

Sonymen birge, depýtat oralmandar máselesine de qozǵaý salyp, bul turǵyda sheshimin tappaı otyrǵan problemalardy aldyǵa tartty. Sonyń negizinde birqatar usynystaryn da jarııalady. «Birinshiden, Eńbek jáne halyqty áleýmettik qorǵaý, Qarjy, Syrtqy jáne ishki ister mınıstrlikteri, «Nur Otan» HDP, Qazaqstan halqy Assambleıasy múshelerinen quralǵan Úkimettiń basqarýymen komıssııa quryp, Mońǵolııadaǵy qandastarymyzdyń naqty jaǵdaıyn zerttep, olardyń elge oralýyna jaǵdaı týǵyzý maqsatynda sheshim qabyldaý kerek. Ekinshiden, Kóshi-qon komıtetin mınıstrlik qaramaǵynan alyp, kóshi-qon saıasatyn jetildirý, ekonomıkalyq jáne demokratııalyq saıasatpen úılesimdi baılanysyn qamtamasyz etý maqsatynda derbes Agenttik retinde qurý kerek. Ony basqarýdy ultymyzdyń joǵyn joqtaı alatyn, ózge elde júrgen qandastarymyzǵa jany ashıtyn azamatqa tapsyrý kerek. Úshinshiden, oralmandarǵa 2010 jylǵa arnalǵan 20 myń kvota qazirgi kezde aýyr jaǵdaıǵa tap bolyp otyrǵan Mońǵolııadaǵy qazaqtarǵa berilýi tıis. Eger kvotasyz-aq kóship kele berýine ruqsat etip, jatyrqap qaramaı, múmkindigi mol jaǵdaı jasap, baýyrymyzǵa tartsaq kóship kelýshiler kóbeıer edi. Tórtinshiden, kóship kelgen jerlesterimizdi ár oblysqa bólip, olardy ornalastyrýda qalypty jaǵdaı jasaý jergilikti atqarýshy organdarǵa qatań tapsyrylýy tıis. Besinshiden, Bilim jáne ǵylym mınıstrligi oralmandar balalarynyń joǵarǵy jáne arnaýly oqý oryndarynda oqýyna arnaıy kvota qarastyrǵany durys. Jalpy oralmandardyń balalarynyń jan-jaqty bilim alyp mamandanýyna barlyq jaǵdaı qarastyrylýy kerek», dedi A. Momyshev.