Mońǵolııadaǵy keshenniń Elteris qaǵanǵa qatysy bolýy úlken jańalyq bolaıyn dep tur - Myrzataı Joldasbekov
ASTANA.QazAqparat - Memleket qaıratkeri, professor Myrzataı Joldasbekov Túrki akademııasy halyqaralyq uıymynyń Mońǵolııadaǵy «Shıveet Ýlan» ǵuryptyq kesheninde júrgizgen qazba jumystarynyń nátıjesine qatysty pikirin bildirip, akademııanyń atqarǵan eńbegin joǵary baǵalady, dep habarlaıdy «QazAqparat» HAA tilshisi.
«Az ýaqyttyń ishinde ıgilikti ister atqarylǵan eken. Ózim qatty qýanyp otyrmyn. Birlese jumys júrgizýdi qolǵa alyp, osynyń bárine muryndyq bolyp otyrǵan Mońǵolııa úkimetine, ondaǵy mýzeı basshylaryna elimizdiń atynan shyn júrekten alǵysymdy bildirgim keledi. Onda uly handarynyń áýletiniń keshenderi jatyr. Sizder baryp (Túrki akademııasy -avt.) zerttegen jaq buryn ashylmaǵan edi. Zertteýshilerdiń tabany tımegen jer edi. Jalpy Qazaqstan men Mońǵolııa jerinde Uly dalanyń tarıhy jatyr. Osy tarıhtyń syryn ashýǵa ekspedıtsııanyń keleshektegi jumysy úlken septigin tıgizedi dep qýanyp otyrmyn. Bul túrkologııa ilimindegi úlken qadam, aıtarlyqtaı jańalyq dep esepteımin. Túrki akademııasy az ǵana ýaqyttyń ishinde Mońǵolııaǵa barǵan saıyn kóp jańalyqtardy ákelip jatyr. Eger shynynda da, ekinshi Túrki qaǵanatyn qurǵan, asa uly túrki qaǵany Elteris Qutlyq qaǵanǵa baılanysty keshender bolatyn bolsa, mynaý úlken bir qudiretti jańalyqtarǵa bolaıyn dep otyr. Sondyqtan, osy ıgiliktijumysqa sáttilik tileımin», - dedi Myrzataı Joldasbekov.
Eske sala ketsek, búgin Ulttyq kitaphanada Túrki akademııasy halyqaralyq uıymynyń prezıdenti Darhan Qydyráli «Kentaıdan Ulytaýǵa deıin: tarıhı sananyń jańǵyrýy» atty ІІI Halyqaralyq ekspedıtsııasyn qorytyndylap, Mońǵolııada júrgizilgen qazba jumystarynyń nátıjesimen tanystyrǵan bolatyn. Mońǵolııanyń «Shıveet Ýlan» ǵuryptyq kesheninde júrgizilgen qazba jumystary nátıjesinde zerttelgen orynnyń Elteris qaǵanǵa arnalǵandyǵy aıqyndalyp otyr.
