Mońǵolııadaǵy qazaq jastaryna Qazaqstanda bilim alý múmkindikteri tanystyryldy
ASTANA. KAZINFORM – Syrtqy ister mınıstrligine qarasty «Otandastar qory» kommertsııalyq emes aktsıonerlik qoǵamy Mońǵolııanyń Baıan-Ólgıı aımaǵynda jergilikti belsendi qazaq jastarymen jáne olardyń ata-analarymen arnaıy kezdesý ótkizip qaıtty.
Іs-sharany uıymdastyrýshylardyń aıtýynsha, basty maqsat – etnıkalyq qazaq jastaryna atajurttaǵy jańa múmkindikter men memlekettik qoldaý baǵdarlamalary, sonyń ishinde «Qandas» mártebesin alý jáne beıimdelý máseleleri týraly jan-jaqty aqparat berý bolǵan.
Jıyn barysynda «Otandastar qory» KEAQ baspasóz hatshysy Aljan Sharıpov uıymnyń sheteldegi qazaq dıasporasymen baılanysty nyǵaıtýǵa baǵyttalǵan strategııalyq jobalaryn tanystyrsa, bilim baǵytyna jaýapty maman Talǵat Kenjebekuly memlekettik bilim granttary men arnaıy shákirtaqylardyń bóliný tártibin egjeı-tegjeıli túsindirgen.
Qazaqstanda joǵary bilim alyp, búginde tabysty eńbek etip júrgen Mońǵolııa týmasy Ómirtaı Bolatbek óz tájirıbesin bólisip, jastarǵa keńes aıtqan.
Sapar aıasynda jergilikti Mýzykalyq drama teatrynda «Qazaqstandyq bilim kúnderi» atty aýqymdy kórme uıymdastyryldy.
– Bul kórme – jastarymyz úshin úlken múmkindik. Sapaly bilim alyp, atajurtpen baılanysty nyǵaıtý – bizdiń basty basymdyǵymyz, - deıdi Baıan-Ólgıı aımaǵynyń ákimi Zańǵar Esentaıuly.
Kórmege L.Gýmılev atyndaǵy Eýrazııa ulttyq ýnıversıteti, Abaı atyndaǵy Qazaq ulttyq pedagogıkalyq ýnıversıteti, Astana IT University, Astana International University, Esil University, M.Tynyshpaev atyndaǵy ALT University, Qorqyt ata atyndaǵy Qyzylorda ýnıversıteti, Y.Altynsarın atyndaǵy Arqalyq pedagogıkalyq ýnıversıteti, Á.Saǵynov atyndaǵy Qaraǵandy tehnıkalyq ýnıversıteti jáne Bolashaq akademııasynyń ókilderi qatysty. Ár ýnıversıtet ókili talapkerlerge oqý baǵdarlamalary, jataqhanamen qamtý jáne halyqaralyq túlek almasý jobalary týraly tolyq málimet berdi.
«Otandastar qorynyń» mamany Talǵat Kenjehanulynyń sózinshe, jyl saıyn Qazaqstan usynatyn granttar men jeńildikterge qyzyǵýshylyq tanytatyn jastardyń sany artyp keledi.
Kórme aıasynda oqýshylar men ata-analar ózderin mazalaǵan suraqtaryn qoıyp, bilim berý júıesin ońtaılandyrý men qujattardy qabyldaý úderisin jeńildetý boıynsha óz usynystaryn ortaǵa saldy.
Buǵan deıin Mońǵolııadaǵy qazaqtar Naýryz meıramyn qalaı toılaıtynyn jazǵan edik.
