Mońǵolııadaǵy Grand Slam: Qazaqstan quramasy týrnırdiń alǵashqy kúnin júldesiz aıaqtady
ASTANA. KAZINFORM – Ulan-Batyrda (Mońǵolııa) dzıýdodan Grand Slam serııasyndaǵy týrnır bastaldy. Bul jarys 2028 jyly AQSh-tyń Los-Andjeles qalasynda ótetin Olımpıada oıyndaryna irikteý kezeńindegi alǵashqy týrnır bolyp sanalady.
Jarystyń alǵashqy kúninde Qazaqstan quramasy júldege qol jetkize almady. Qazaqstandyq dzıýdoshylar arasynda eń úzdik nátıjeni Dıana Búrkeeva (48 kelige deıin) kórsetti. Ol jubanysh beldesýine deıin jetip, onda ıspanııalyq Abelında Martıneske ese jiberdi. Osy salmaq dárejesinde Ǵalııa Tynbaeva ekinshi aınalymda frantsııalyq Shırın Býklıden jeńilip, jarysty aıaqtady.
QR UOK málimetinshe, erler arasyndaǵy 60 kelige deıingi salmaqta Maǵjan Shamshadın alǵashqy beldesýinde ıtalııalyq Bıadjo Andjelodan jeńilse, Aman Baqytjan ekinshi aınalymda grýzııalyq Georgıı Sardalashvılıge jol berdi.
66 kelige deıingi salmaqta Nurqanat Serikbaev pen Aqjigit Nasyr jarysty 1/8 fınal kezeńinde aıaqtady. Serikbaev ázerbaıjandyq Rýslan Pashaevten jeńilse, Nasyr mońǵolııalyq Erhembaıar Battogtohqa ese jiberdi.
Áıelder arasynda 52 kelige deıingi salmaqta Arýjan Erejepova alǵashqy beldesýinde mońǵolııalyq Gal-Od Tserentogtohtan jeńildi. Al 57 kelige deıingi salmaqta Dana Ábdirova túrikmenstandyq Maısa Pardaevadan utylsa, Dına Muhanbet Irına Zýevaǵa jol berdi.
Aıta keteıik, Qazaqstannyń eki gımnasty Azııa chempıonatynyń fınalyna joldama aldy.
