Mońǵolııadaǵy dala órti Qytaı shekarasyna jaqyndady
ASTANA. KAZINFORM – Mońǵolııa aýmaǵynda tutanǵan dala órti Qytaı shekarasyna qaraı taralyp jatyr. Tilsiz jaýdyń el aýmaǵyna ótýine jol bermeý úshin Qytaıdyń soltústigine 2 myńnan astam adam jumyldyryldy, dep habarlaıdy Sınhýa.
Jergilikti bıliktiń málimetinshe, órt Mońǵolııa aýmaǵynda bastalyp, Qytaıdyń Іshki Mońǵolııa avtonomııalyq aýdanymen shekaralas aımaqqa qaraı jyljyp keledi.
Osyǵan baılanysty Qytaı tarapy shekara mańyndaǵy aýmaqtarda órttiń taralýyn toqtatý jumystaryn kúsheıtken.
– 11 qazan kúni saǵat 21:00-degi jaǵdaı boıynsha órt Qytaı aýmaǵyna ótken joq. Qazir jalynnyń taralýyna jol bermeý jumystary jalǵasyp jatyr, – dep habarlady jergilikti bılik ókilderi.
Órtti oqshaýlaý sharalaryna 2 myńnan astam adam tartylǵan.
Ázirge órt sharpyǵan aýmaqtyń kólemi men onyń shyǵý sebebi týraly naqty aqparat jarııalanǵan joq.
Aıta keteıik, buǵan deıin Grekııanyń Leros jáne Evbeıa araldarynda, sondaı-aq Kardıtsa okrýginde orman órtteri tutanyp, tilsiz jaýdy sóndirýge jerústi qyzmetteri men avıatsııa jumyldyrylǵan bolatyn.
