Mońǵolııada «Jańa Harhorým» qalasynyń irgetasy qalandy
ASTANA. KAZINFORM — Mońǵolııa Prezıdentiniń Jarlyǵyna sáıkes, Harhorým qalasynyń qurylysy saltanatty túrde Memlekettik týdy kóterý rásimimen bastaldy. Bul tý «Uly handar baǵynda» máńgi jelbireıtin bolady, dep habarlaıdy Montsame.
2022 jyly Shyńǵys hannyń týǵanyna 860 jyl tolýyna oraı, Mońǵolııa Prezıdenti Ýhnaagıın Hýrelsúh Orhon ózeniniń ańǵarynda ornalasqan, dúnıejúzilik tarıhı jáne mádenı mura sanalatyn Harhorým qalasyn qaıta qalpyna keltirý týraly Jarlyqqa qol qoıǵan bolatyn. Osy Jarlyqqa sáıkes, jańa qalanyń qurylysy resmı túrde bastaldy.
Saltanatty ashylý rásiminde Prezıdent Ýhnaagıın Hýrelsúh sóz sóılep, Harhorým qalasyn keń Orhon ańǵarynda salý barysynda tarıhı qujattar, arheologııalyq tabylǵan derekter jáne kýálikter negizinde 800 jyldan astam ýaqyt burynǵy Uly handar dáýiriniń kelbetin qaıta jańǵyrtý qajettigin atap ótti.
— Bul rette, eń aldymen, avtokólik jáne temirjol joldary, áýejaılar, jylý jáne elektr energııasy kózderi, qoqys óńdeý zaýyttary, tazartý qurylystary, qalalyq jasyl aımaqtar, aýyl sharýashylyq klasterlerin qurý, sondaı-aq ózender men kólderdi qalpyna keltirý sııaqty iri ınfraqurylymdyq jobalardy iske asyrý qajet, — dedi Memleket basshysy.
Jalpy aýdany 1500 gektar aýmaqta damytylatyn Harhorým qalasy aıasynda 1 mıllıonnan astam qylqan japyraqty jáne japyraqty aǵashtar men butalar otyrǵyzylady. Ótken bir aı ishinde memlekettik jáne jeke sektordan 800-den astam adam 550 myńnan astam aǵash otyrǵyzdy. Tek «Uly handar baǵynda» memlekettik jáne jeke sektor ókilderi birigip 11 myń aǵash egip, 13 myń sharshy metr avtoturaq, 11 myń sharshy metr trotýar salyp, elektrmen jabdyqtaý, jaryqtandyrý, qudyqtar jáne sýarý júıesimen qamtamasyz etti.
«Jańa Harhorým» 500 myń adamǵa shaqtalyp salynady, sonymen qosa 285 myń jumys ornyn ashady. Bul ony aımaqtyq damýdyń mańyzdy ortalyǵyna aınaldyrady. Sondaı-aq, bul jerde memlekettik mekemeler, halyqaralyq uıymdardyń ókildikteri men sheteldik elshilikter ornalasqan «aqyldy» qala qurylatyn bolady. Qalada áleýmettik, medıtsınalyq, ınfraqurylymdyq, joǵary tehnologııalyq óndiris, turǵyn úı, mádenıet, óner, týrızm, kógaldandyrý jáne basqa da qyzmetter damytylady. Mysaly, qalanyń jalpy aýdanynyń 50%-yn jasyl aımaqtar, 30%-yn qurylys nysandary, al 20%-yn joldar alyp jatady.
Harhorým qalasy halyq tyǵyzdyǵyn azaıtýǵa, bul óz kezeginde qoǵamǵa, ekonomıkaǵa, azamattardyń ómiri men densaýlyǵyna keri áser etetin máseleler — shamadan tys júkteme, aýa, sý jáne topyraqtyń lastanýyn sheshýge septesedi. Jańa qala azamattar úshin qaýipsiz ári salaýatty ortada ómir súrýge jaǵdaı jasap, negizgi áleýmettik qyzmettermen qamtamasyz etedi jáne jańa qonystaný aımaqtarynyń qalyptasýyna negiz bolady.
Mońǵolııanyń Uly memlekettik hýraly Harhorým qalasyn josparlaý, salý jáne damytý týraly Zańdy maquldady, al Úkimet Harhorým qalasyn damytý ákimshiligin, onyń ishinde Qalalyq keńes pen Ǵalymdar keńesin qurdy.
Buǵan deıin Mońǵolııada úkimet basshysy aýysqany týraly jazǵan edik.