Mońǵolııada UOK quramyndaǵy federatsııalar sany 170-ke jetti
ASTANA. KAZINFORM — Mońǵolııanyń ulttyq olımpıada komıteti 2026 jylǵa arnalǵan jumys josparyn bekitti, dep habarlaıdy Montsame.
Mońǵolııanyń ulttyq olımpıada komıtetiniń (UOK) barlyq músheleriniń jalpy jınalysy ótip, onda 2026 jylǵa arnalǵan jumys jospary, bıýdjeti, qurylymy men quramy bekitildi.
Sonymen qatar, olımpıadalyq qozǵalysty basqarý tıimdiligin arttyrý jáne úılestirýdi jaqsartý maqsatynda UOK jarǵysyna ózgerister engizildi. Naqtyraq aıtqanda, olımpıadalyq sport túrleri federatsııalarynyń teń ókildigin qamtamasyz etýge baǵyttalǵan túzetýler qabyldandy. Úsh ókili bar federatsııalarda olardyń keminde bireýi áıel bolýy tıis ekeni qarastyryldy.
Jınalysta UOK quramyna kiretin úsh jańa federatsııa maquldandy. Atap aıtqanda, olar — flag-fýtbol (2028 jyly 2028 jazǵy Olımpıada oıyndary baǵdarlamasyna engizilgen), fıdjıtal sport jáne akademııalyq eskek esý federatsııalary. Osylaısha, UOK-ke múshe federatsııalar sany 170-ke jetti.
Eske salaıyq, bıyl Mońǵolııa quramasynyń sportshylary Aıtı–Nagoıa–2026 Azııa oıyndaryna, Dakar–2026 jazǵy jasóspirimder Olımpıadasyna, sondaı-aq Er-Rııad–2026 jabyq keshendegi jáne jaýyngerlik óner boıynsha Azııa oıyndaryna qatysady.
Budan buryn Mońǵolııada ótetin taekvondodan Azııa chempıonatynda 1300-den asa sportshy baq synaıtynyn jazdyq.
