Mońǵolııada úkimet basshysy aýysty
ASTANA. KAZINFORM – Gombojavyn Zandanshatar Mońǵolııanyń 34-premer-mınıstri bolyp taǵaıyndaldy, dep habarlaıdy Montsame.
13 maýsymda Gombojavyn Zandanshatar Mońǵolııanyń 34-premer-mınıstri retinde resmı túrde qyzmetine kiristi.
Mońǵolııanyń 33-premer-mınıstri Lývsannamsraın Oıýýn-Erdene ókilettiligin tapsyra otyryp, Zandanshatarǵa Mońǵolııany damytý jolyndaǵy úlken eńbegine sáttilik tiledi jáne eldiń uzaqmerzimdi damý saıasaty — «Kózqaras 2050» baǵdarlamasyn jalǵastyrýyn surady.
Jańa premer-mınıstr Gombojavyn Zandanshatar óz kezeginde Lývsannamsraın Oıýýn-Erdenege tabys tilep, onyń «Kózqaras 2050», «Jańa qalpyna keltirý saıasaty» jáne iri damý megajobalaryn tabysty júzege asyrý jolyndaǵy joǵary jetistikteri men eńbegi Mońǵolııa tarıhynda qalatynyn atap ótti. Sondaı-aq ol eks-premerge bolashaq bastamalarynda sáttilik tiledi.
Sonymen qosa Mońǵolııa Prezıdenti Ýhnaagıın Húrelsúhtiń ókimine sáıkes Altanhýıagıın Ýılstýgýldýr Mońǵolııa Prezıdenti Ákimshiliginiń basshysy bolyp taǵaıyndaldy.
Qysqasha ómirbaıany:
-
1999–2003 jj. – Mońǵolııanyń Ulttyq qoǵamdyq radıo jáne teledıdarynda júrgizýshi;
-
2002–2006 jj. – «Ýlaanbaatar» radıosyndaǵy FM-101.7 tolqynynda júrgizýshi jáne prodıýser;
-
2006–2009 jj. – FM-104 radıostantsııasynyń dırektory;
-
2009–2011 jj. – TV-8 telearnasynyń dırektory;
-
2011–2013 jj. – «SEVEN» telearnasynyń dırektory;
-
2013–2014 jj. – Mońǵolııanyń Sotsıal-demokratııalyq jastar odaǵynyń qoǵammen baılanys jáne BAQ jónindegi bóliminiń basshysy;
-
2016 jyldan bastap – Mońǵolııanyń Sotsıal-demokratııalyq jastar odaǵy Basqarma keńesiniń múshesi;
-
2016–2017 jj. – Mońǵolııa Premer-mınıstriniń orynbasarynyń keńesshisi;
-
2017–2020 jj. – Mońǵolııa Premer-mınıstriniń keńesshisi;
-
2019 jyldan bastap – Mońǵolııanyń Telekommýnıkatsııalardy retteý komıtetiniń múshesi;
-
2020–2021 jj. – Mońǵolııa Premer-mınıstriniń keńesshisi;
-
2021 jyldan bastap – Mońǵolııa Prezıdenti Ákimshiligi basshysynyń orynbasary.
Buǵan deıin Mońǵolııa parlamenti «El premer-mınıstrine senim votýmy týraly» qaýlynyń qabyldanýyn qoldamaǵany belgili boldy.