Mońǵolııada turatyn qazaqtarǵa 5 myń dana kitap jetkizildi
ULANBATYR. KAZINFORM — Mońǵolııadaǵy qazaq dıasporasyna 5 myń dana kitap jetkizildi. Olardy Ulanbatyrda resmı is-saparmen júrgen Syrtqy ister mınıstri Murat Nurtileý saltanatty túrde tabys etti.
Bul bastamany QR Syrtqy ister mınıstrligi, Mádenıet jine aqparat mınıstrligi jáne «Otandastar qory» Qazaqstan men Mońǵolııa arasyndaǵy mádenı-gýmanıtarlyq baılanystardy nyǵaıtý maqsatynda qolǵa alǵan.
Bes myń kitap arasynda zamanaýı qazaq aqyn-jazýshylarynyń shyǵarmalary jáne balalar ádebıetiniń jańa jınaqtary bar.
− Mońǵolııadaǵy qazaqtar – eki el arasyndaǵy berik dostyqtyń altyn kópiri. Olarǵa óz mádenıeti men tilin saqtaýǵa qmqorlyq tanytyp, qoldap júrgeni úshin mońǵol memleketiniń basshylyǵyna jáne úkimetine úlken alǵysymyzdy jetkizgim keledi. Men de búgin osy eldegi qazaqtarǵa 5 myń dana kórkem ádebı kitaptar syılaǵym kelgen bolatyn. Bul rette áriptesime osy naýqanǵa qoldaý kórsetkeni úshin taǵy da alǵys bildiremin, - dep atap ótti Murat Nurtileý Mońǵolııa Syrtqy qatynastar mınıstri B. Battsetsegpen kezdesýinde.
Aıta keteıik, Mońǵolııa – qazaq dıasporasy kóp turatyn eldiń biri. Búginde Mońǵolııada halyq sany 3,5 mıllıonnan asady, onda 28 ult, ulys jáne etnostyq top bar. Qazaqtar el halqynyń 4% quraıdy.
Árıne, syılyqty mundaǵy qazaqtar qýana qabyl aldy. Mońǵolııanyń Halyq jazýshysy, memleket jáne qoǵam qaıratkeri, dıplomat Sultan Táýkeıulynyń aıtýynsha, qazir Mońǵolııada 150 myńnan astam qazaqtar ómir súredi. Kóptegen qazaqtar atajurtqa – Qazaqstanǵa qonys aýdaryp jatyr.
− Bul kitapty jańa bizdiń Parlamenttegi azamattar qabyldady. Baıan Ólgeıde aımaqtyq kitaphana bar, soǵan barady. Odan bólek 13 aýdan bar, bizde aýdandy «sýmyn» dep ataıdy. Aýdandyq kitaphanalarǵa barady, qyryqtan astam mektep bar. Sol mektepterdiń bári qazaq tilinde oqıdy. Keleshek jetkinshikter alyp oqıdy dep otyrmyz. Bul tabylmaıtyn múmkindik. Qazaqstannan jyl saıyn mundaı kitaptar kelip turady. «Otandastar» qoǵamdyq qory byltyr da biraz kitap tapsyryp ketken. Jyl saıyn oqýlyqtar kelip turady. Bizdiń orta mektepter kóbine Qazaqstan oqýlyǵyn paıdalanady. Sondyqtan bul asa oraıly múmkindik boldy, − dedi Sultan Táýkeıuly tilshilerge bergen suhbatynda.
Buǵan deıin Mońǵolııada qazaqstandyq ýnıversıtet fılıalyn ashý usynylǵan edi. Óıtkeni bul elden bizge kelip te oqıtyn jastar kóp.
Eske salsaq, byltyr 28-29 qazan kúnderi Prezıdent Qasym-Jomart Toqaev Mońǵolııaǵa memlekettik saparmen barǵan edi.