Mońǵolııada prezıdentti saılaý naýqany bastaldy
ULANBATYR. MONTsAME-QazAqparat – Búgin Mońǵolııada prezıdentti saılaý naýqany resmı túrde bastaldy, dep habarlaıdy QazAqparat Mońǵolııanyń MONTsAME agenttigine silteme jasap.
24 mamyr kúni Bas saılaý komıssııasy (BSK) prezıdenttik saılaý kandıdattary Ý.Húrelsýh (Mońǵolııa halyq partııasynan, Kúrelsúk dep oqylady), S.Erdene (Demokratııalyq partııa) jáne D.Enhbatqa (Durys úmitker, elektorat koalıtsııasy, Enkbat dep oqylady) kýálikterdi tabystady. Osylaısha, saılaýaldy naýqan daýys berýge 16 kún qalǵanda bastalyp ketti.
Sondaı-aq búgin BSK el Prezıdentin saılaý týraly zańyna sáıkes Sybaılas jemqorlyqqa qarsy kúres basqarmasyna prezıdentke úmitker kandıdattardyń tabystary týraly esep beredi. Kandıdattardyń tabysy týraly esep basqarmanyń resmı saıtynda jarııalanady. Ulttyq aýdıtorlyq basqarma daýys berý bastalǵansha óziniń saıtynda kandıdattardyń saılaýaldy baǵdarlamasynyń baǵalanýyn jarııalaý qajet.
Prezıdentti saılaý týraly zańǵa sáıkes, saılaý naýqany 15 kúnge sozylady, bul ýaqytta saıası partııalar men kandıdattarǵa tómende atalǵandardan basqa saılaýaldy úgit-nasıhat júrgizýge tyıym salynady:
- Úgit-nasıhat baspa materıaldary saılaýshylar arasynda jappaı taratýǵa arnalǵan;
- Teledıdar men radıoda saılaýaldy úgit júrgizý;
- Saılaý naýqanynda áleýmettik jelini qoldaný;
- Kósheler men alańdarda úgit-nasıhat plakatyn ornalastyrý;
- Saılaýaldy shtab jumysy.
