Mońǵolııada prezıdent saılaýy bastaldy
ULANBATYR. MONTsAME-QazAqparat – 9 maýsym kúni Mońǵolııada el prezıdentin saılaý bastaldy. Bul týraly QazAqparat Mońǵolııanyń MONTsAME aqparat agenttigine silteme jasap habarlaıdy.
Saılaý ýchaskeleri jergilikti ýaqyt boıynsha tańǵy saǵat 7:00-de ashylyp, 22:00-ge deıin jumys isteıtin bolady.
Bıylǵy jyldan bastap Mońǵolııa prezıdenti 6 jyldyq merzimge saılanady. Prezıdent qyzmetine osy joly usynylǵan kandıdattar arasynda Mońǵol Halyq partııasynyń atynan – L.Hýrelsýha, Demokratııalyq partııadan – S.Erdene jáne «Jóni durys adam, Elektorat» koalıtsııasynan D.Enhbata bar.
Saılaýshylar tiziminde 2 040 784 adam tirkelgen. Bul kúni búkil el boıynsha 2087 saılaý ýchaskesi jumys istep otyr, al bıýlletender qoldan sanalady.
Keshe, 8 maýsym kúni daýys berýge arnalǵan kóshpeli saılaý jáshikteriniń kómegimen eldiń 25 619 azamaty daýys bergen. Sondaı-aq, qyzyl aımaqta jumys istep júrgen memlekettik qyzmetshiler, abaqtyda otyrǵan 7 051 azamat jáne ınfektsııa juqtyrmaǵan, biraq saılaý ýchaskelerine kele almaıtyn shamamen 18 myń adam daýys berdi. Budan basqa, Mońǵolııanyń 30 eldegi 44 dıplomatııalyq ókildiginde saılaý ýchaskeleri qurylyp, 30-31 mamyr kúnderi merziminen buryn daýys berý ótti. Shetelde tirkelgen 7 394 azamattyń 76 paıyzy (5 618 adam) óz tańdaýyn jasady.
Prezıdenttik saılaýdy sheteldik jáne halyqaralyq uıymdardyń 43 uıymy baqylap, 40 tilshi aqparat taratady.
