Mońǵolııada mınýs 38.1 gradýs aıaz tirkeldi

Ótken túnde Mońǵolııanyń soltústik-batysyndaǵy Zavhan aımaǵy Telmen somonynda mınýs 38.1 Tselsıı gradýsqa deıin aıaz tirkeldi. Bul týraly beısenbi kúni eldiń Qorshaǵan orta meteorologııa jáne monıtorıngi ınstıtýty málim etti. Kazinform bul týraly Sınhýa agenttigine silteme jasap habarlaıdy.

«Sársenbi túnde Mońǵolııanyń kóp bóliginde tirkelgen aıazdan keıin Sýhbaatar, Hentıı, Dornod jáne Dornogov aımaqtarynda qalyń qar jaýdy. Aýa raıynyń qolaısyzdyǵyna baılanysty Qytaımen shekaradaǵy Dornod jáne Dornogov shyǵys aımaqtarynda ýaqytsha joldar jabyldy», - delingen resmı habarlamada.

Meteorologtardyń sózinshe, Mońǵolııada apta sońyna deıin osyndaı aıaz saqtalady. Jalpy Mońǵolııada qys qatty ári uzaq bolady. Aýa temperatýrasy 25 gradýstan 45 gradýs nólden tómenge deıin jetedi.

1966 jyldyń 26 jeltoqsanynda Mońǵolııanyń soltústik-batysyndaǵy Ývs aımaǵy Zýýngov somonynda eń sýyq aýa raıy — mınýs 55,6 Tselsıı gradýs tirkelgenin eske sala keteıik.