Mońǵolııada «Mıllıard aǵash» qozǵalysy aıasynda 117 mıllıon túp kóshet otyrǵyzyldy

ASTANA. KAZINFORM – Mońǵolııa Prezıdentiniń bastamasymen qolǵa alynǵan «Bir mıllıard aǵash» ulttyq qozǵalysy aıasynda júrgizilip jatqan kúzgi jalpyulttyq aǵash otyrǵyzý naýqany bıyl qazan aıynyń sońyna deıin jalǵasady, dep habarlaıdy Kazinform Montsame aqparat agenttigine silteme jasap.

«Montsame»-niń habarlaýynsha, ótken demalys kúnderi Ýlaanbaatar qalasynyń úsh aımaǵynda 225 memlekettik jáne jekemenshik uıymdar men kásiporyndardan jınalǵan 2500-den astam adam 12 túrli aǵash pen butanyń shamamen 3500 kóshetin otyrǵyzǵan. Oqýshylar da bul sharaǵa erikti túrde qatysyp jatyr.

Kúzgi otyrǵyzý kúnderi aıasynda el boıynsha 18 myńnan astam uıym, kásiporyn jáne jeke adamdar 2 mıllıonnan astam aǵash otyrǵyzǵan. Sondaı-aq aımaqtarda, sumdarda jáne elordada kóshet jármeńkeleri uıymdastyryldy. Buǵan deıin, bıylǵy kóktemde, 3400-den astam uıym men kásiporyn jáne 185 myńnan astam azamat 8,4 mıllıon aǵash otyrǵyzǵan.

Resmı derekterge sáıkes, elde shóleıttený úderisine qarsy kúres aıasynda qozǵalys bastalǵannan beri 117 mıllıon aǵash pen buta otyrǵyzylyp, ósirilgen.

Boljam boıynsha, 2030 jylǵa deıin iri taý-ken kásiporyndary 608 mıllıon aǵash, al aımaqtar men elorda 680 mıllıonnan astam aǵash pen buta otyrǵyzylýy tıis.

Aǵash otyrǵyzý boıynsha bul jalpyulttyq kampanııa Mońǵolııa Prezıdentiniń 2010 jylǵy Jarlyǵyna sáıkes jyl saıyn mamyr jáne qazan aılarynda ótkiziledi.

Aıta keteıik, Mońǵolııa qar barysyn saqtaý jónindegi halyqaralyq qor quramyna qosylatynyn málimdegen.