Mońǵolııada memlekettik kásiporyndar sany 30%-ǵa qysqardy

Úkimet otyrysynda «Memlekettik kásiporyndarǵa qatysty keıbir sharalar týraly» qaýly bekitilip, «Memlekettik jáne mýnıtsıpaldyq kompanııalardy korporatıvtik basqarý týraly» zańdy iske asyrý jumystary bastaldy.

Atap aıtqanda, memlekettik kásiporyndardyń sany 30%-ǵa qysqartylyp, 25 uıym memlekettik bıýdjetten shyǵarylmaq. Sonymen qatar shtat sany 108-324-ke deıin qysqartylady. Jalaqy qory men ózge de aǵymdaǵy shyǵyndardy azaıtý esebinen 30 mlrd týgrık únemdeý josparlanyp otyr.

2027 jylǵy 1 qańtardan bastap «Memlekettik jáne mýnıtsıpaldyq kompanııalardy korporatıvtik basqarý týraly» zańnyń kúshine enýine baılanysty Úkimet onyń iske asyrylýyn qamtamasyz etý maqsatynda birqatar memlekettik kásiporyndy qaıta uıymdastyrý, qoǵamdyq qyzmet kórsetetin memlekettik mekemelerge aınaldyrý jáne taratýǵa qatysty tizimderdi bekitti. Atalǵan tizimder úkimet qaýlysyna qosymsha retinde qabyldandy.

Qaýly jobasyna sáıkes, biriktirý jáne taratý sharalary 25 memlekettik kásiporyndy qamtıdy. 2025 jylǵy derek boıynsha, bul uıymdarda jalpy sany 2162 adam jumys istegen, al olardyń jyldyq eńbekaqy qory 73,2 mlrd týgrıkti quraǵan.

Aldyn ala esepteýlerge sáıkes, basqarýdaǵy qaıtalanatyn fýnktsııalardy, ákimshilik jáne sharýashylyq qyzmetterdi biriktirý, sondaı-aq uıymdardyń qurylymy men shtat sanyn ońtaılandyrý josparlanyp otyr.

Ǵımarattardy paıdalaný, kólik qyzmeti, is júrgizý, memlekettik satyp alý, aqparattyq tehnologııalar jáne basqa da ákimshilik-sharýashylyq fýnktsııalardy ortalyqtandyrý aǵymdaǵy shyǵyndardy qysqartyp, bıýdjet qarajatyn paıdalaný tıimdiligin arttyrýǵa múmkindik beredi.

2025 jylǵy málimet boıynsha, eldegi 65 memlekettik kásiporynda 7030 adam jumys isteıdi. Onyń 26-sy óz qyzmetinen túsetin tabys esebinen shyǵyndaryn tolyq jabady. Al qalǵan 39 kásiporyn memlekettik bıýdjetten jalpy somasy 153,1 mlrd týgrık kóleminde sýbsıdııa alady.

Osydan buryn Mońǵolııa bıligi benzın satýǵa ýaqytsha shekteý engizgenin jazǵanbyz.