Mońǵolııada mal basy 78 mıllıonǵa jetti
ASTANA. KAZINFORM — 2025 jyldyń sońyndaǵy mal sanaǵynyń qorytyndysy boıynsha elde 58,09 mıllıon bas mal tirkelgen, dep habarlaıdy Montsame.
Óńirler boıynsha alǵanda, eń kóp mal basy Batys óńiriniń bes aımaǵynda – 13,7 mıllıon jáne Hangaı óńirinde – 13,6 mıllıon basty quraıdy. Al eń tómengi kórsetkish Ortalyq óńir aımaqtarynda tirkelip, munda 5,5 mıllıon bas mal esepke alynǵan.
Ortalyq, Batys jáne Hangaı óńirleriniń birqatar aýmaqtarynda maldyń qystan shyǵýy men kóktemgi tól alý naýqany kúrdeli jaǵdaıda ótti. Soǵan baılanysty Súhbaatar, Darhan-Ýýl, Tóv jáne Óvórhangaı aımaqtarynyń keıbir sumyndarynda ahýal qıyndady. Sondaı-aq Baıan-Ólgıı, Ývs jáne Zavhan aımaqtarynyń jekelegen sumyndarynda da jaǵdaı kúrdeli bolyp otyr. Al Dornod aımaǵynda kenetten qaýipti tabıǵı qubylys tirkeldi.
Bıyl el kóleminde 17 mıllıon bas mal tóldep, nátıjesinde 16,8 mıllıon tól alyndy. Aldyn ala esep boıynsha, eldegi mal basynyń jalpy sany 78 mıllıonǵa jetken.
Aıta ketelik Mońǵolııa alǵash ret Dúnıejúzilik jylqy kúnin atap ótken edi.
