Mońǵolııada qoı qyrqý boıynsha ulttyq «Altyn qaıshy-2025» baıqaýy ótti
ASTANA. KAZINFORM — Týv aımaǵynyń Zýýnmod somonynda Mońǵolııa Prezıdenti Ýhnaagıın Húrelsúhtiń qamqorlyǵymen alǵashqy ulttyq «Altyn qaıshy — 2025» qoı qyrqý baıqaýy ótti.
Baıqaýdyń maqsaty — mal sharýashylyǵynan alynatyn shıkizatty qaıta óńdeýdi arttyrýǵa, qoı júniniń qundylyǵyn kóterýge, ony qaldyqsyz paıdalanýǵa jáne júnnen jasalatyn daıyn ónimderdi qoldaýǵa baǵyttalǵan «Aq altyn» ulttyq qozǵalysyn jandandyrý. «Altyn qaıshy — 2025» ulttyq baıqaýy qoı qyrqýdyń tıimdi ádisteri men tehnologııalaryn engizýge, malshylardyń jumysyn jeńildetýge jáne bul kásipke jastardy tartýǵa múmkindik beredi.
Baıqaý úsh atalym boıynsha ótti: dástúrli qaıshymen qyrqý, elektrondy qaıshymen qyrqý jáne kásibı qyrqý. Qazylar alqasynyń quramyna Avstralııadan kelgen maman, Jańa Zelandııadan jeti maman, sondaı-aq malshylar, ǵalymdar men zertteýshiler kirdi.
«Altyn qaıshy» qoı qyrqý boıynsha halyqaralyq baıqaýy alǵash ret 1961 jyly Jańa Zelandııada uıymdastyrylǵan bolatyn. Búginde álemniń 15 elinde bul baıqaý jergilikti erekshelikterge saı turaqty túrde ótkiziledi.
Baıqaý aıasynda jún men kashemırden jasalǵan buıymdardyń kórmesi, sán kórsetilimi, jún óńdeý ádisteri, sadaq atý jáne shopandar arasyndaǵy án baıqaýy da ótti.
18 aımaqtan kelgen 19 ben 70 jas aralyǵyndaǵy 100-den astam shopan «Altyn qaıshy — 2025» baıqaýyna qatysty. Ár atalym boıynsha jeńimpazdar Prezıdent kýbogymen marapattaldy, al elektrondy qaıshymen qyrqý sanatyndaǵy jeńimpazdar 2026 jyly ótetin qoı qyrqýdan álem chempıonatyna qatysý quqyǵyn jeńip aldy.
Aıta ketelik Mońǵolııada qoı qyrqý boıynsha álemdik saıys ótetini týraly jazǵan edik.