Mońǵolııada koronavırýs ınfektsııasy tirkeldi
ULANBATYR. QazAqparat - Mońǵolııada koronavırýstyń alǵashqy jaǵdaıy Dornogov aımaǵynda tirkeldi, dep habarlaıdy QazAqparat tilshisi.
Infektsııa juqtyrǵan azamat 2020 jyldyń 2 naýryzynda Mońǵolııaǵa Máskeý-Ýlaanbaatar baǵytyna qatynaıtyn ushaqpen kelgen. Ol — bul elde ýaqytsha turýǵa tirkelgen 56 jastaǵy Frantsııa azamaty. Odan alynǵan aldyn ala zertteýler nátıjesinde onyń «COVID-19 « vırýsyn juqtyrǵany anyqtaldy.
Syrqat qazirgi ýaqytta Dornogov aımaǵynyń Ýlaanbadrah sumynynda (aýyl) ornalasqan «Areva» (mońǵolsha «Badrah enerjı») kompanııasynyń ǵımaratynda oqshaýlanǵany jaıly resmı derekkózder málimdep otyr. Oqshaýlanǵan frantsýz «Areva» kompanııasynda jumys isteıdi.
Búgin tańerteńgi saǵat 6-da Tótenshe jaǵdaılar jónindegi arnaıy komıssııa basshysy, Premer-mınıstrdiń orynbasary Ólzıısaıhany Enhtúvshınniń keńsesinde shuǵyl jınalys ótkizip, naýqaspen áýe reısinde, qonaq úıler men poıyzda birge bolǵan azamattardy anyqtady. Jol qatynastaryn keler dúısenbige deıin toqtaýǵa sheshim qabyldady.
Bul jóninde Mońǵolııanyń Tótenshe jaǵdaılar jónindegi arnaıy komıssııanyń bastyǵy, premer-mınıstrdiń orynbasary Ólzıısaıhany Enhtúvshın: «Aldyn ala boljam boıynsha azamat koronavırýs juqtyrǵan. Alaıda qaıtadan test tapsyryp, rastaımyz. Eger jaǵdaı aýyrlaıtyn bolsa, Eýropaǵa ushatyn áýe resteriniń barlyǵyn toqtatamyz», - dedi.
Qýat Ýathan
