Mońǵolııada qoljetimdi baspana úshin arnaıy bank qurylmaq

ASTANA. KAZINFORM — Mońǵolııada arnaıy turǵyn úı bankiniń jobasyn ázirleý úshin jumys toby quryldy, dep habarlaıdy Montsame.

Búgin Mınıstrler kabınetiniń kezekti otyrysynda arnaıy turǵyn úı bankin qurý máselesin zerdeleý jáne tıisti usynystar daıyndaý maqsatynda jumys toby quryldy.

Bul bastama týraly Úkimet baspasóz qyzmetiniń jetekshisi N.Baasandamba málimdedi. 

— Premer-mınıstr taǵaıyndalǵannan keıin Parlament minberinen halyqtyń ómir súrý sapasyn arttyrý jáne qoljetimdi baspanaǵa qoljetimdilikti keńeıtý maqsatynda arnaıy turǵyn úı bankin qurý nıeti jarııalanǵan bolatyn. Búgin osy bastamany júzege asyrý maqsatynda jumys toby qurylyp, oǵan arnaıy turǵyn úı bankin qurý jobasyn ázirlep, 13 tamyzǵa deıin Mınıstrler kabınetine usyný tapsyryldy. Jumys tobynyń jetekshisi bolyp Ekonomıka jáne damý mınıstri Nıam-Osoryn Ýchral taǵaıyndaldy. Bul — turǵyn úı bankin qurý boıynsha Premer-mınıstr strategııasyn júzege asyrýdaǵy alǵashqy qadam, — dedi Baasandamba.

Sondaı-aq top quramyna Úkimet isterin basqarýshy Sandagıın Baıambatsogt, Qarjy mınıstri Boldyn Javhlan, Qorshaǵan orta jáne klımattyń ózgerýi jónindegi mınıstr Batyn Batbaatar, sonymen qatar Otbasy, eńbek jáne áleýmettik qorǵaý isteri jónindegi mınıstr Tıleýhan Aýbakır endi.

Jumys tobynyń basty maqsaty — halyqaralyq standarttarǵa saı turǵyn úı qarjylandyrý týraly zań jobasyn ázirleý, Turǵyn úı qarjylandyrý korporatsııasyn qurý, sondaı-aq jyljymaıtyn múlikpen jáne kepilmen qamtamasyz etilgen baǵaly qaǵazdardy qoldaý úshin salyq saıasaty arqyly tetikter engizý.

Budan buryn Mońǵolııa 1 shildeden bastap onlaın qumar oıyndarǵa tolyǵymen tyıym salǵanyn jazǵanbyz.