Mońǵolııada qazaqstandyq eksportty qoldaıtyn Seriktestik keńsesi ashylady

2026 jylǵy 17–19 maýsym aralyǵynda Saýda jáne ıntegratsııa mınıstrliginiń Birinshi vıtse-mınıstri Aıjan Ádilqyzy Bıjanova bastaǵan qazaqstandyq delegatsııa Mońǵolııaǵa jumys saparymen bardy.

Sapar aıasynda Mońǵolııa Úkimeti basshylyǵymen, atap aıtqanda Premer-mınıstrdiń orynbasary Nıamtaıshıryn Nomtoıbaıarmen, Ónerkásip jáne mıneraldyq resýrstar mınıstri Gongoryn Damdınnıammen, Ekonomıka jáne damý mınıstrliginiń Memlekettik hatshysy Ideshıın Bathýýmen, sondaı-aq eldiń bıznes jáne salalyq qaýymdastyq ókilderimen kezdesýler ótti.

Taraptar saýda-ekonomıkalyq yntymaqtastyqtyń qazirgi ahýaly men ony odan ári damytý perspektıvalaryn, ózara saýda kólemin ulǵaıtý, birlesken ınvestıtsııalyq jobalardy júzege asyrý, kólik-logıstıka baǵyttaryn damytý jáne eki el kásipkerleri úshin jańa múmkindikter qalyptastyrý máselelerin talqylady.

Sapar barysynda taý-ken jáne óńdeý ónerkásibindegi yntymaqtastyqqa erekshe nazar aýdaryldy. Bul baǵyt Qazaqstan men Mońǵolııa arasyndaǵy ózara is-qımyldyń eń keleshegi zor salalarynyń biri sanalady. Qazaqstandyq delegatsııa «Erdenes Mongol» memlekettik holdınginiń, «Erdenes Critical Minerals» kompanııasynyń, Mońǵolııanyń iri ónerkásiptik toby «Mongolyn Alt (MAK)»-tyń basshylyǵymen, sondaı-aq Mońǵolııa ulttyq taý-ken qaýymdastyǵynyń ókilderimen kelissózder júrgizdi.

Kezdesýler barysynda mıneraldyq-shıkizat qoryn ıgerý, paıdaly qazbalardy óndirý jáne óńdeý, joǵary qosylǵan quny bar óndiristik tizbekterdi damytý, sondaı-aq jer qoınaýyn paıdalaný salasynda tájirıbe almasý máseleleri qarastyryldy. Qazaqstan tarapy taý-ken ónerkásibi kásiporyndarynyń áleýetin tanystyryp, shıkizatty óńdeý, ónerkásiptik jabdyq shyǵarý jáne zamanaýı tehnologııalardy engizý baǵytyndaǵy múmkindikterin usyndy.

Saýda-ınvestıtsııalyq yntymaqtastyqty qarjylaı qoldaý máseleleri boıynsha Mońǵolııa Ulttyq bankiniń tóraǵasymen de kelissózder ótti. Taraptar syrtqy saýda operatsııalaryn qarjylyq qamtamasyz etý, kásipkerlerge arnalǵan qarjy quraldaryn keńeıtý jáne ınvestıtsııalyq áriptestikti nyǵaıtý máselelerin talqylady.

Sapardyń mańyzdy nátıjeleriniń biri – «QazExportPromotion» AQ men mońǵolııalyq «MAKS GRÝPP» holdıngi arasynda ózara túsinistik týraly memorandýmǵa qol qoıylýy boldy. Qujat Mońǵolııada qazaqstandyq eksporttaýshylarǵa qoldaý kórsetetin, jańa iskerlik seriktester izdeýge, bıznes-mıssııalar men kórmeler uıymdastyrýǵa, sondaı-aq otandyq ónimdi ilgeriletýge arnalǵan turaqty jumys isteıtin Seriktestik keńsesin ashýdy kózdeıdi.

Jańa keńseniń ashylýy eki el kásipkerleri arasyndaǵy tikeleı baılanystardy nyǵaıtyp, qazaqstandyq bıznestiń Mońǵolııa naryǵyndaǵy qatysý aıasyn keńeıtýge, sonyń ishinde ónerkásip pen tehnologııanyń jańa baǵyttaryn ıgerýge yqpal etedi.

Sapar aıasynda «GP Bright», «MAX Impex», «BUJT LLC», «Green Group Mongolia», «Goyol Cashmere», «Khanbogd Cashmere» kompanııalarynyń jáne salalyq uıymdardyń ókilderimen de kezdesýler ótti. Kezdesýler barysynda agroónerkásip kesheni, ónimdi óńdeý, qurylys materıaldaryn óndirý, jeńil ónerkásip jáne eksportqa baǵyttalǵan óndiristerdi damytý salalaryndaǵy yntymaqtastyq múmkindikteri talqylandy.

Saýda baılanystaryn keńeıtýge Mońǵolııa men Eýrazııalyq ekonomıkalyq odaq arasyndaǵy Ýaqytsha saýda kelisiminiń kúshine enýi de serpin beredi. Bul qujat qazaqstandyq ónimderdiń Mońǵolııa naryǵyna shyǵý múmkindigin odan ári arttyrýǵa qolaıly jaǵdaı jasaıdy.

Aıta ketelik Qazaqstan men Mońǵolııa agrarlyq ǵylym salasynda yntymaqtastyqty kúsheıtedi.